კათოლიკური მონაზვნური ორდენი „Little Sisters of the Poor“ („ღარიბთა პატარა დები“) დღეს, 6 მაისს აპირებს, დაასრულოს შვიდწლიანი დავა და ამისათვის სასამართლოს მიმართავს. არსებული პანდემიის პირობებში უზენაესი სასამართლოს ცხრა მოსამართლე სატელეფონო ზარის მეშვეობით მოუსმენს ორივე მხარის არგუმენტებს.
„ესენი არიან კათოლიკური ორდენის მონაზვნები, რომლებიც ღარიბ მოხუცებსა და მომაკვდავებს ეხმარებიან, ყველაზე სუსტ და დაუცველ ადამიანებს, განსაკუთრებით ამ პანდემიის პერიოდში.“ ‒ აცხადებს უფროსი ადვოკატი დაიანა ვერმი, ბეკეტის რელიგიურ უფლებათა იურიდიული ჯგუფის წარმომადგენელი. დიანა ვერმი მონაზვნების უფლებადამცველია ამ სასამართლო დავისას.
ორდენს პრობლემები მას შემდეგ შეექმნა, რაც მან უარი განაცხადა 2010 წელს გამოცემული კანონის (The Affordable Care Act) შესრულებაზე. ხსენებული კანონი მოითხოვს, რომ დამსაქმებლებმა, რომლებიც დასაქმებულთა სამედიცინო დაზღვევას უზრუნველყოფენ, ამ დაზღვევაში გაითვალისწინონ კონტრაცეპტივებთან დაკავშირებული ხარჯებიც. ახალი რეგულაცია იძულებულს გახდიდა მონაზვნებს, საკუთარი სინდისისა და მრწამსის წინააღმდეგ მოქცეულიყვნენ და დაეფარათ აბორტის გამომწვევი კონტრაცეპტივების ხარჯები საკუთარი ჯანდაცვის გეგმებში.
2016 წელს მონაზვნებმა მოიგეს დავა აშშ-ის უმაღლეს სასამართლოში და გათავისუფლდნენ ამ კანონის შესრულებისგან. სასამართლოს ამ გადაწყვეტილებით უკმაყოფილო ზოგიერთი შტატი (მაგალითად, პენსილვანია) ისევ აღძრავს საქმეს უმაღლეს სასამართლოში.
დიანა ვერმმა „CBN News“-ს განუცხადა, რომ „შტატები ფედერალური მთავრობისგან ითხოვენ იმას, რომ მონაზვნებმა დაფარონ კონტრაცეპტივებთან დაკავშირებული ხარჯები. ეს შტატები ხელისუფლებას იმაში ედავებიან, რომ მას არ აქვს უფლება, რელიგიურ მოსაზრებათა გამო ადამიანთა ესა თუ ის ჯგუფი გაათავისუფლოს არსებული წესების შესრულებისგან. ეს დიდ საფრთხეს უქმნის ჩვენს ქვეყანაში რელიგიურ უმცირესობათა დაცვის ხანგრძლივ ისტორიას.“
მონაზვნების ორდენი თუ წააგებს სასამართლო დავას, შესაძლოა, მას დაეკისროს ჯარიმა წელიწადში 60-70 მლნ. დოლარის ოდენობით.
სოციალური დისტანცირების გამო ეს იქნება პირველი შემთხვევა, როდესაც უზენაეს სასამართლოში მოსმენა სატელეფონო კავშირის საშუალებით გაიმართება.