„დაე, შემეწიოს ღმერთი“ – ეს ფრაზა გახდა დავის საგანი აშშ-ში, ალაბამის შტატში, სადაც ათეისტთა დამცველი ორგანიზაცია The Freedom From Religion Foundation ამომრჩევლის სარეგისტრაციო ფიცს ასაჩივრებს. ორგანიზაციამ ალაბამის შტატის ოთხი მოქალაქის სახელით, სასამართლოში სარჩელი შეიტანა. მოქალაქეები აცხადებენ, რომ შტატის ამომრჩევლის სარეგისტრაციო ფიცი არაკონსტიტუციურია.
სარეგისტრაციო ფორმაში სხვადასხვა პუნქტია მოცემული ამომრჩევლების მიერ დასადასტურებლად. ფორმა სრულდება ასეთი სიტყვებით: „აქ მოცემული ინფორმაცია სიმართლეა, დაე, შემეწიოს ღმერთი“. აღსანიშნავია, რომ ალაბამა ერთადერთი შტატია, სადაც ამომრჩევლის რეგისტრაციის ფიცი ამ სიტყვებს შეიცავს.
„არც შტატის და არც ფედერალურ მთავრობას არ შეუძლია, კონსტიტუციის გამოყენებით აიძულოს ადამიანი, აღიაროს ნებისმიერი რელიგიისადმი რწმენა ან ურწმუნოება.“ – წერია სარჩელში.
საჩივარში ორგანიზაცია მოითხოვს, რომ ალაბამის შტატის მდივანმა „რეგისტრაციის შესაბამისი ფორმებით უზრუნველყოს ის პიროვნებები, რომლებსაც არ შეუძლიათ, დაიფიცონ სიტყვებით: ‘დაე, შეგვეწიოს ღმერთი.’“