ხაიფას უნივერსიტეტის დოქტორმა ადი ელრიხმა The Times of Israel-თან ინტერვიუში განაცხადა, რომ ბოლო ხანს ისრაელში აღმოჩენილი ეკლესია აშენებულია მე-4 ან მე-5 საუკუნეში. კვლევები ცხადყოფს, რომ ქრისტიანმა მშენებლებმა ტაძარი ყოფილ რომაულ, წარმართულ სამლოცველოზე დააშენეს.
ისტორიკოსები ვარაუდობენ, რომ ქრისტიანებმა ტაძარი ბანიას ნაკრძალში ააშენეს, ისრაელის ჩრდილოეთით, ფილიპეს კესარიაში სწორედ იესო ქრისტესა და პეტრესთან დაკავშირებული ბიბლიური გადმოცემის სამახსოვროდ.
შეგახსენებთ, რომ მათეს სახარების მე-16 თავი პეტრეს მიერ იესოს მესიად აღიარების შესახებ გვიამბობს. იესო კი პასუხად მიუგებს: „მე გეუბნები, რომ შენ ხარ პეტრე და ამ კლდეზე ავაშენებ ჩემს ეკლესიას, რომელსაც ვერ დაძლევენ ჯოჯოხეთის ბჭენი.“
ისტორიული ცნობების მიხედვით, ბერძნული ღმერთის – პანისადმი მიძღვნილი თავდაპირველი ტაძარი აშენდა ქრისტეს შობამდე მე-3 საუკუნეში. ქრისტეს შობიდან 320 წელს კი იგი ქრისტიანულ სამლოცველოდ გადაკეთდა.
არქიტექტურულად ღია სტილის მქონე ტაძარს ასევე გამოარჩევდა ტაძრის შუაში არსებული პატარა აუზი. ეკლესიის იატაკი მოპირკეთებული იყო პატარა ჯვრებით. არქეოლოგებს მიაჩნიათ, რომ ის ადგილი, სადაც ტაძარში პანის ქანდაკება იდგა, გადაკეთდა ეკლესიის აფსიდად. აღმოჩენილ იქნა კიდევ ერთი, საინტერესო ქვა ზედ ამოტვიფრული ჯვრებით. ისტორიკოსებს მიაჩნიათ, რომ ეს ჯვრები ქვაზე სამახსოვროდ არის დატოვებული VI-VII საუკუნის მომლოცველების მიერ.
„ისტორიიდან ცნობილია, რომ როდესაც ქრისტიანობა სახელმწიფო რელიგიად ცხადდებოდა რომელიმე ქვეყანაში, ისინი არ ეძებდნენ ახალ ადგილებს ტაძრებისთვის, არამედ ცდილობდნენ წარმართული თაყვანისცემის ადგილების ქრისტიანულ სამლოცველოებად გადაკეთებას.“ – თქვა ელრიხმა.
როგორც დოქტორმა ადი ელრიხმა განუცხადა The Times of Israel-ს, ბანიას ეროვნულ პარკში, სადაც ტაძრის ნაშთები იქნა აღმოჩენილი, არის რამდენიმე ისტორიული არტეფაქტიც, რომლებიც მოიცავს დროის მონაკვეთს რომაული პერიოდიდან ჯვაროსნებამდე.