ბიბლიის აპლიკაციას YouVersion უკვე 500 მლნ ჩამოტვირთვა აქვს, თუმცა, როგორც აპლიკაციის შემქმნელები აცხადებენ, ეს ჯერ კიდევ არ არის საბოლოო შედეგი. აპლიკაციის ჩამოტვირთვების რიცხვი დღესდღეობით 500,171,744-ია.
აპლიკაციის წარმატებას კომპანია ერთი ბიბლიური მუხლით ეხმაურება:
„ვინაიდან ღვთის სიტყვა არის ცოცხალი, მოქმედი და ყოველგვარ ორლესულ მახვილზე უფრო ბასრი…“ (ებრაელთა4:12).
კომპანიის წარმომადგენლები ამბობენ: „დღეს ჩვენ აღვნიშნავთ 500 მილიონ ჩამოტვირთვას, მაგრამ მოუთმენლად ველით, რას მოიმოქმედებს ღმერთი ამის შემდეგ. წარმოიდგინეთ ის დღე, როდესაც აპლიკაციას უკვე ერთი მილიარდი ჩამოტვირთვა ექნება.“
აპლიკაცია პოპულარულია იმის გამო, რომ ის იძლევა წაკითხულის ჩანიშვნის, ბიბლიური მუხლების მონიშვნისა და გაზიარების და ასევე, ბიბლიის სხვადასხვა თარგმანის გამოყენების შესაძლებლობას.
ხსენებული ბიბლიის აპლიკაცია 2008 წელს შეიქმნა და App Store-ში განთავსებულ 200 უფასო აპლიკაციას შორის ერთ-ერთი პირველი იყო. აპლიკაციის მეშვეობით წმინდა წერილი ხელმისაწვდომია 60-ზე მეტ სხვადასხვა ენაზე. მომხმარებლებს ასევე აქვთ შესაძლებლობა იმისა, რომ იხილონ ბიბლიის ინგლისური თარგმანის 67 სხვადასხვა ვერსია.
აპლიკაცია YouVersion მოუწოდებს მომხმარებლებს, გაიარონ აპლიკაციაში მოცემული კურსი ‘The Bible is Alive’ („ცოცხალი ბიბლია“), სადაც განიხილება ის, თუ როგორ ცვლის წმინდა წერილი ადამიანების ცხოვრებას და როგორ აცნობს მათ სახარებას.
აპლიკაცია ქართულენოვანი ბიბლიის რამდენიმე ვერსიასაც შეიცავს.
ქართველი ბავშვებისათვის უკვე ხელმისაწვდომია ბიბლიის საბავშვო აპლიკაცია, რომელიც YouVersion აპლიკაციათა ოჯახის უახლესი წევრია, უფასოა და ხელმისაწვდომია ანდროიდის და iOS სისტემის მქონე სმარტფონებისა და პლანშეტებისთვის. ბიბლიის საბავშვო აპლიკაცია განკუთვნილია 7-დან 14 წლამდე ბავშვებისთვის.
აპლიკაციის ჩამოწერა შეგიძლიათ საიტიდან: www.bible.com/ka/kids