დონალდ ტრამპმა ცოტა ხნის წინ თეთრი სახლიდან ბოლო საშობაო გზავნილით პრეზიდენტის რანგში ამერიკელებს შობის დღესასწაულის მთავარი არსი და მიზეზი შეახსენა.
„როგორც ქრისტიანებმა მთელ სამყაროში იციან, ჩვენი უფლისა და მაცხოვრის დაბადებამ სამუდამოდ შეცვალა ისტორია. შობას მადლობას ვუხდით ღმერთს და მადლიერნი ვართ, რომ მან გამოგზავნა თავისი მხოლოდშობილი ძე, რათა ის მომკვდარიყო ჩვენთვის და შეეთავაზებინა მთელი კაცობრიობისთვის მარადიული მშვიდობა.“ – განაცხადა დონალდ ტრამპმა.
ტრამპმა განაცხადა, რომ ქრისტიანთათვის ეს არის სიხარულით სავსე დრო, რადგან იხსენებენ ღვთის ყველაზე დიდ საჩუქარს, რაც კაცობრიობას მიეცა.
„იესო ქრისტეს დაბადებიდან ორ ათასწლეულზე მეტი ხანია, რაც მისი სწავლებანი ისევ შთააგონებს და აღაფრთოვანებს მილიარდობით ადამიანს მთელ მსოფლიოში. მისი ღვთაებრივი სიტყვები ისევ ავსებს ჩვენს გულებს იმედითა და რწმენით.“ – თქვა ტრამპმა გამოსვლისას.
პრეზიდენტმა ასევე ისაუბრა იმის შესახებ, რომ შობა არის პერიოდი, როდესაც ქრისტიანებმა განსაკუთრებით უნდა გაიხსენონ ის, რაც ქრისტემ მცნებად დაუტოვა თავის მოწაფეებს: „გიყვარდეთ ერთმანეთი“.
ტრამპმა თითოეულ ამერიკელ ოჯახს უსურვა უფლისგან სიხარულით, იმედითა და მშვიდობით სავსე შობის სადღესასწაულო პერიოდი და მთელ ამერიკას მიულოცა დამდეგი შობა-ახალი წელი.