ეგვიპტეში, ელ-მინიის საგუბერნატოროს სოფელ ალ ბარშაში, მუსლიმანები თავს დაესხნენ კოპტი ქრისტიანების ეკლესიას, მათ სახლებსა და ზოგიერთ მაღაზიას. თავდასხმა გამოწვეული იყო გავრცელებული ხმებით იმის შესახებ, რომ ქრისტიანმა მამაკაცმა სოციალურ ქსელში გამოაქვეყნა ისლამისა და წინასწარმეტყველ მუჰამედის შეურაცხმყოფელი სტატია. ისლამისტურ დაჯგუფებებთან დაახლოებულმა ადამიანებმა ქვები და ე.წ. „მოლოტოვის კოქტეილები“ გამოიყენეს თავდასხმისას.
სულ მცირე, ერთი ხანდაზმული ქრისტიანი ქალი იქნა გადაყვანილი საავადმყოფოში საკუთარ სახლში მიღებულ დამწვრობათა შედეგად.
მამაკაცი, რომელიც “ფეისბუკის” საკუთარ გვერდზე ისლამის შეურაცხმყოფელი სტატიის გამოქვეყნებაში დაადანაშაულეს, აცხადებს, რომ მისი “ფეისბუკის” გვერდი გატეხეს.
მუსლიმანებმა ასევე სცადეს ეკლესია აბუ სეფინზე თავდასხმა, სადაც მრევლი კოპტური მარხვის დაწყებას აღნიშნავდა. ამის შესახებ ინფორმაცია გაავრცელა დიდ ბრიტანეთში არსებულმა ადამიანთა უფლებადამცველმა ორგანიზაციამ Christian Solidarity Worldwide.
თავდასხმიდან ცოტა ხნის შემდეგ ელ-მინიის გუბერნატორმა, გენერალმა ოსამა ალ ქადიმ, სოფლის თავკაცები შეკრიბა დაძაბულობის განსატვირთად და ხალხის დასამშვიდებლად. ალ ქადიმ მუსლიმან სასულიერო პირებს მოუწოდა, მეჩეთში წარმოთქმული ქადაგებებისას ყურადღება გაემახვილებინათ მშვიდობიან თანაარსებობასა და შემწყნარებლობაზე.