ცნობილი გახდა, რომ შვეიცარიელი მისიონერი ბეატრის სტოკლი ისლამისტმა ექსტრემისტებმა რამდენიმე კვირის წინ მოკლეს მალიში. იგი 2016 წლის იანვარში გაიტაცეს ტიმბუკტუდან და ოთხი წლის განმავლობაში ტყვედ იმყოფებოდა.
ბეატრისის გასათავისუფლებლად ისლამური მაღრიბის ქვეყნების ალ-ქაიდა მოითხოვდა მალიში დაპატიმრებული დაჯგუფების მებრძოლთა და ჰააგაში დაკავებული ჯგუფის ერთ-ერთი ლიდერის გათავისუფლებას. უმთავრესი პირობა კი ის იყო, რომ სტოკლი აღარ უნდა დაბრუნებულიყო არცერთ მუსლიმანურ ქვეყანაში ქრისტიანობის საქადაგებლად. შვეიცარია კი თავის მხრივ მოითხოვდა, რომ ბეატრის სტოკლი ყოველგვარი პირობების გარეშე გაეთავისუფლებინათ, რაც არ განხორციელდა.
ბეატრის სტოკლის სიკვდილით დასჯის შესახებ ინფორმაცია გავრცელდა ფრანგი სოფიე პეტრონინისგან, რომელმაც ტყვედ ყოფნისას ისლამი მიიღო. ის გახლავთ ჰუმანიტარული მისიის 75 წლის თანამშრომელი, რომელიც ასევე 2016 წელს გაიტაცეს და გაათავისუფლეს 2020 წლის 8 ოქტომბერს.
როგორც ცნობილია ექსტრემისტული დაჯგუფების წევრები ხშირად იცვლიან ადგილსამყოფელს, რათა მალელმა ან ფრანგმა სამხედროებმა მათ კვალს არ მიაგნონ. პეტრონინის გადმოცემით, ბეატრისმა უარი თქვა სხვაგან გაჰყოლოდა ისლამისტებს საჰარას უდაბნოში. ამის გამო გამტაცებლებმა სტოკლი გარეთ გაათრიეს და ესროლეს.
შვეიცარიის საგარეო საქმეთა სამინისტრომ მწუხარება გამოთქვა ბეატრის სტოკლის სიკვდილთან დაკავშირებით და განაცხადა, რომ მისი გარდაცვალების დეტალები, ჯერჯერობით, უცნობია.
გარდა ამისა, შვეიცარიის ხელისუფლების წარმომადგენლები აცხადებენ, რომ მალის ხელისუფლებასა და სხვა საერთაშორისო პარტნიორებთან ერთად, ბოლო ოთხი წლის განმავლობაში ყველაფერს აკეთებდნენ ბეატრის სტოკლის გასათავისუფლებლად. ახლა კი ამბობენ, რომ ყველაფერს მოიმოქმედებენ, რათა შვეიცარიის მოქალაქის ცხედარი ან მისი ნეშტი, ადრე თუ გვიან, ოჯახს დაუბრუნონ.
შეგახსენებთ, რომ ბეატრის სტოკლიმ თავის მოღვაწეობა ტიმბუკტუში 2002 წელს დაიწყო. თავდაპირველად, ის შვეიცარიის ეკლესიასთან თანამშრომლობდა, შემდეგ კი დამოუკიდებლად დაიწყო მსახურება. ბეატრისი მალის უღარიბეს ქალებს ეხმარებოდა. პირველად ის 2012 წელს გაიტაცეს, თუმცა ათი დღის შემდეგ გაათავისუფლეს. დედისა და ძმის დაჟინებული თხოვნით, ბეატრისი შვეიცარიაში ჩავიდა, თუმცა მალევე ისევ ტიმბუკტუში დაბრუნდა. „ან ტიმბუკტუ, ან არაფერი,“ – ამბობდა ის.