სამხრეთ კორეაში მცხოვრები ქრისტიანი ლიდერი, ერიკ ფოლი, ლოცვით მხარდაჭერას ითხოვს ბრალის წაყენების მოლოდინისას, რადგანაც გასულ კვირას სამხრეთ კორეის პოლიციამ რეკომენდაცია მისცა პროკურორებს – ბრალი წაუყენონ მას. ერიკ ფოლი ბოლო 15 წლის განმავლობაში ჰელიუმის ბუშტების მეშვეობით ბიბლიებს აგზავნის ჩრდილოეთ კორეაში.
„ბრალდების ერთ-ერთი მუხლი უკავშირდება სამხრეთ და ჩრდილოეთ კორეას შორის გაცვლითი კანონის დარღვევას. ეს კანონი ეხება ჩრდილო და სამხრეთ კორეის კომერციულ წესრიგს. ყველაფერი, რაც გადის ქვეყნიდან, ჩრდილოეთში უნდა იყოს სახელმწიფოს მიერ დამტკიცებული. მეორე ბრალდება ეროვნულ უსაფრთხოებას ეხება. ისინი ბრალს გვდებენ, რომ ჩვენ მიერ გაშვებულმა ბუშტებმა საფრთხე შეუქმნა ეროვნულ უსაფრთხოებას.“ – განაცხადა ფოლმა.
კორეელი მორწმუნე, რომელიც ბრალის წაყენების მოლოდინშია, ქრისტიანებისგან ლოცვით დახმარებას ითხოვს.
შეგახსენებთ, რომ ჩრდილოეთ კორეაში მისიონერებს ვერ გზავნიან, მაგრამ ქრისტიანები უკვე წლებია ცდილობენ, სახარება სხვადასხვა შემოქმედებითი ხერხით გაავრცელონ. სახარებებს ამაგრებენ ჰელიუმით გაბერილ საჰაერო ბუშტებს და ჩრდილოეთ კორეაში უშვებენ. გარდა ამისა, ბუშტებზე მიმაგრებულია GPS მოწყობილობა, რომლის მეშვეობითაც იგებენ, სად დაეშვა ბუშტები. ეს კი მისიონერებს იმის განსაზღვრაში ეხმარება, იყო თუ არა შესაძლებელი, რომ რიგით მოქალაქეს აეღო ბუშტი.
საერთაშორისო ორგანიზაცია “Open Doors”-ის 2020 წლის მონაცემებით, ჩრდილოეთ კორეა პირველ ადგილს იკავებს იმ ქვეყნებს შორის, სადაც ქრისტიანები იდევნებიან. იგი ცნობილია შრომითი ბანაკებით, სადაც გატაცებული ადამიანები იმყოფებიან; მათი ზუსტი რიცხვი კი უცნობია.