ფრანკლინ გრემი მოუწოდებს ქრისტიანებს, გაერთიანდნენ და ილოცონ არჩეული პრეზიდენტის, ჯო ბაიდენისა და ვიცე-პრეზიდენტის, კამალა ჰარისისთვის იმ რთულ პერიოდში, რომელშიც ამერიკის შეერთებული შტატები იმყოფება.
გრემმა, რომელიც პრეზიდენტ ტრამპის მხარდამჭერი იყო, ხუთშაბათს მიმართვა გამოაქვეყნა სოციალურ ქსელში „ფეისბუკსა“ და „ტვიტერზე“.
„დაპირისპირება და დაყოფა ჩვენს ქვეყანაში ისეთივე დიდია, როგორიც ადრე, სამოქალაქო ომის შემდეგ იყო. მოვუწოდებ ქრისტიანებს, გავაერთიანოთ ჩვენი გულები და ვილოცოთ არჩეული პრეზიდენტისა და ვიცე-პრეზიდენტის, და ასევე ორივე პარტიის ხელმძღვანელობისთვის.
ვილოცოთ, რომ ყველამ შეწყვიტოს თითის გაშვერა და გააცნობიეროს, რომ ორივე პარტია აგებს პასუხს იმ პრობლემებზე, რომლებსაც დღეს ვაწყდებით. ვილოცოთ, რათა ისინი გაერთიანდნენ და ერთად იმუშაონ ყოველი ამერიკელის საკეთილდღეოდ.“
გრემმა ეს მიმართვა ჯო ბაიდენის პრეზიდენტად დამტკიცებიდან რამდენიმე საათში გამოაქვეყნა და მას დიდი გამოხმაურება მოჰყვა. სულ რაღაც ერთ საათში 40 000 კომენტარი დაიდო. კომენტარები არაერთაზროვანი გახლდათ. იყვნენ ადამიანები, ვინც იწონებდა გრემის მოწოდებას და ადამიანებიც, რომლებიც უარყოფით დამოკიდებულებას ავლენდნენ ლოცვის მოწოდებაზე მთავრობისთვის.
შეგახსენებთ, რომ საარჩევნო კოლეგიის მიერ მიცემული ხმების მიხედვით, აშშ-ის პრეზიდენტი ჯო ბაიდენი გახდება, ვიცე-პრეზიდენტი კი – კამალა ჰარისი. ისინი მოვალეობის შესრულებას 20 იანვრიდან შეუდგებიან.