ჩინეთის ხელისუფლებამ კიდევ უფრო გაამკაცრა კანონები ქრისტიანების მიმართ და ქვეყნის რამდენიმე პროვინციაში აკრძალა 18 წლამდე პირთა დასწრება საეკლესიო ღვთისმსახურებებზე და ასევე, მონაწილეობა რელიგიურ ღონისძიებებში. ეკლესიებს აეკრძალათ საზაფხულო ბანაკების ორგანიზება ახალგაზრდებისათვის.
ამის შესახებ ჩინეთის ხელისუფლებამ ცოტა ხნის წინ გააფრთხილა ჯეძიანის პროვინციის ქალაქ ვენჯოუში არსებული ეკლესიები.
საერთაშორისო უფლებადამცველი ორგანიზაცია Open Doors-ის აღმასრულებელი დირექტორის, დევიდ კერის თქმით, ბიბლიის შემსწავლელ ჯგუფებში დასწრების გამო ბავშვებს შესაძლოა არ მიეცეთ სასურველ კოლეჯში ჩაბარებისა და სწავლის, ასევე მუშაობის შესაძლებლობა, ხოლო მშობლები შეიძლება სამსახურის გარეშე დარჩნენ.
ორგანიზაციის მიერ გამოქვეყნებულ 2022 წლის ანგარიშში ჩინეთი მე-17 ადგილზეა მსოფლიოში ქრისტიანთა დევნის მხრივ. ქვეყანაში, დაახლოებით, 96 მლნ ქრისტიანია. ჩინეთის ხელისუფლება ყველაფერს აკეთებს იმისათვის, რომ აკონტროლოს ეკლესიები და ცალკეული ქრისტიანები. ქვეყანაში არის ისეთი ეკლესიები, რომლებიც კომუნისტური პარტიის მიერ დაწესებულ მკაცრ შეზღუდვებს ემორჩილება. ამ შეზღუდვებს შორისაა ქადაგებების ცენზურა. სწორედ ამიტომ, ბევრი ქრისტიანი იატაკქვეშა ეკლესიებს ამჯობინებს. ბუდიზმიდან ან ისლამიდან მოქცეული ქრისტიანები ორმაგ დევნას განიცდიან: საკუთარი ახლობლებისა და ასევე ხელისუფლების მხრიდან.
შეგახსენებთ, რომ ბოლო წლებია, ჩინეთის კომუნისტური ხელისუფლება მაღალტექნოლოგიურ სათვალთვალო საშუალებებს იყენებს ეკლესიების გასაკონტროლებლად. ბევრ ეკლესიას ხურავენ კიდეც. ქვეყნის ხელისუფლებამ ასევე აკრძალა ბიბლიების ონლაინგაყიდვა.