გავლენიანი ამერიკელი ტელეევანგელისტი, ქრისტიანული ტელევიზია “CBN”-ის დამფუძნებელი, რამდენიმე საქველმოქმედო, საგანმანათლებლო და უფლებადამცველი ორგანიზაციის თანადამფუძნებელი და საზოგადო მოღვაწე პეტ რობერტსონი გუშინ, 8 ივნისს, თავის სახლში, ქ. ვირჯინია ბიჩში გარდაიცვალა. 1930 წელს დაბადებულმა რობერტსონმა 1960 წელს დააარსა “CBN” – მსოფლიოში ცნობილი ქრისტიანული ტელერადიოსამაუწყებლო კორპორაცია. მას მრავალი წლის განმავლობაში მიჰყავდა თავისი ცნობილი საავტორო ყოველდღიური შოუ „კლუბი 700“. იგი აქტიურად იყო ჩართული რონალდ რეიგანის საპრეზიდენტო მარათონში და მხარს უჭერდა მას. ხოლო რეიგანის ორვადიანი პრეზიდენტობის შემდეგ, 1988 წელს ის აშშ-ის პრეზიდენტობის კანდიდატიც გახლდათ რესპუბლიკური პარტიიდან. პეტ რობერტსონი ცნობილი იყო თავისი კონსერვატორული შეხედულებებით და ღიად განიხილავდა ისეთ საჭირბოროტო სოციალურ საკითხებს, როგორებიცაა აბორტები, ლგბტ თემის უფლებები და ა. შ. 2018 წელს რობერტსონმა ინსულტი გადაიტანა და 2 წლის წინ, ცნობილი შოუ „კლუბი 700“-ის დაარსებიდან 60 წლის თავზე მან დატოვა წამყვანის პოსტი და ის თავის ვაჟს, გორდონს, გადააბარა. მას ჰყავდა მეუღლე ადელია ელმერ რობერტსონი, რომელიც 2022 წელს 94 წლის ასაკში გარდაიცვალა და რომელთანაც მას 4 შვილი, 14 შვილიშვილი და 24 შვილთაშვილი ჰყავს.