არაკომერციული ქრისტიანული ორგანიზაცია Lifeway Christian Resources-ის ინფორმაციით, პანდემიის მიუხედავად, გასული წლის განმავლობაში მთელ მსოფლიოში იმატა ბიბლიების გაყიდვების რიცხვმა.
Lifeway Christian Resources, რომელიც ქრისტიანული წიგნებისა და საგანმანათლებლო მასალების მსხვილი მიმწოდებელია, ახალ ანგარიშში აღნიშნავს, რომ ბიბლიების გაყიდვათა რაოდენობამ აშშ-ში განსაკუთრებით იმატა გასული წლის აპრილსა და ივლისს შორის პერიოდში.
ორგანიზაციის აღმასრულებელი დირექტორის, ბენ მანდრელის აზრით, ეს გამოწვეულია იმით, რომ ადამიანები ეძებენ იმედს და კურნებას ისეთ რთულ პერიოდში, როგორიცაა პანდემია.
„ჩვენ გვჯერა, რომ ეს არ არის შემთხვევითობა, რადგან ადამიანები ხშირად მიმართავენ ბიბლიას კრიზისისა და გაურკვევლობის დროს, როგორც იმედის წყაროს.“ – ამბობს მანდრელი.
ორგანიზაცია დაარსდა 1891 წელს და მას შემდეგ ის ქრისტიანებს აწვდის ბიბლიებს, ბიბლიის შესწავლისათვის საჭირო რესურსებს, ქრისტიანულ წიგნებს, ბავშვებისათვის განკუთვნილ მასალებს, ფილმებსა და მუსიკას.
როგორც Christian Headlines-ი წერდა 2020 წლის აპრილში, ორგანიზაცია LifeWay Christian Resources-ის გაყიდვების რიცხვმა 62%-ით მოიმატა ერთი კვირის განმავლობაში. 2019 წლიდან მოყოლებული 143%-ით გაიზარდა ბიბლიების გამომცემლის, Alabaster Co.-ის მიერ გაყიდული ბიბლიების რაოდენობა. კიდევ ერთი ქრისტიანული გამომცემლობის, Tyndale House Publishers-ის ინფორმაციით, 2019 წლის მარტიდან 2020 წლის მარტამდე მნიშვნელოვნად იმატა ბიბლიების გაყიდვათა რიცხვმა.