კვირას, 18 აპრილს ინტერნეტსივრცეში გავრცელდა ვიდეო, რომელშიც ასახული იყო ისლამური სახელმწიფოს მიერ 62 წლის ეგვიპტელი კოპტი ქრისტიანის, ნაბილ ელ-ჰაბაშ სალამას სიკვდილით დასჯა. სალამას გვარი ერთ-ერთი უძველესი კოპტი ოჯახია ბირ ალ-აბდში. ნაბილ ჰაბიშის ვაჟის განცხადებით, ისლამური სახელმწიფოს ტერორისტებს სამიზნეში ჰყავდათ ამოღებული მამამისი ქალაქში წმ. მარიამის სახელობის ეკლესიის მშენებლობაში შეტანილი წვლილის გამო.
ნაბილ ჰაბაში სამი თვის განმავლობაში ჰყავდათ გატაცებული ხსენებული სამხედრო დაჯგუფების წარმომადგენლებს და 18 აპრილს თავში გასროლით მოკლეს. მკვლელობის ამსახველ ვიდეოში ტერორისტები საუბრობდნენ იმის შესახებ, რომ ყურანი მოითხოვს ქრისტიანების დამცირებას. ისინი ეგვიპტელ ქრისტიანებს აფრთხილებდნენ, რომ ჯარის იმედი არ ჰქონოდათ და „განდგომილებს“ უწოდებდნენ მათ, ვინც ჯარს უჭერდა მხარს.
19 აპრილს ეგვიპტის შინაგან საქმეთა სამინისტრომ განაცხადა ნაბილ ჰაბაშის მკვლელობაში დამნაშავე სამი ტერორისტის დახოცვის შესახებ. ოფიციალურ განცხადებაში ნათქვამი იყო, რომ სამინისტრომ მიიღო ინფორმაცია ტერორისტების ადგილსამყოფელის შესახებ. ჯგუფი გეგმავდა კოპტი ქრისტიანების ქონებაზე, სამლოცველოებსა და პოლიციის განყოფილებებზე თავდასხმას. ეგვიპტის სამხედრო ძალების წარმომადგენლებმა ალყა შემოარტყეს ტერორისტების სამალავს. ორმხრივი სროლის შედეგად ერთ-ერთი ტერორისტის ასაფეთქებელი ქამარი აფეთქდა, რამაც სამივე ტერორისტის სიკვდილი გამოიწვია.
ეგვიპტის კოპტურმა მართლმადიდებელმა ეკლესიამ, რომლის მეთაურიც პატრიარქი თეოდორე მეორეა, გლოვა გამოაცხადა ნაბილ ჰაბაშის მოწამეობრივი სიკვდილის გამო და ასევე მოიხსენია შეიარაღებული ძალებისა და პოლიციის წარმომადგენლები, რომლებმაც სიცოცხლე გაწირეს ტერორისტებთან ბრძოლაში.