დაპატიმრებული ვიეტნამელი ხუცესის ვაჟი ამბობს, რომ ხელისუფლების წარმომადგენლები სიკვდილით ემუქრებიან და აიძულებენ ქრისტიანული რწმენის უარყოფას.
Radio Free Asia-ს ინფორმაციით, ვიეტნამში მცხოვრები, მონტანიარდების ხალხის წარმომადგენელი, ხუცესი ი იეჩი, 2007 წელს დააკავეს და 6 წლით თავისუფლების აღკვეთა მიუსაჯეს სახელმწიფოს წინააღმდეგ შეთქმულების მოწყობის ბრალდებით. 4 წლის შემდეგ ის გაათავისუფლეს. 2013 წელს კი ხელმეორედ დააპატიმრეს და ამჯერად 12 წლით თავისუფლების აღკვეთა მიუსაჯეს.
Radio Free Asia-სთან მიცემულ ინტერვიუში ხუცესის ვაჟი მრუი ამბობს, რომ მისი ოჯახი კვლავ იდევნება მიუხედავად იმისა, რომ ხუცესი ი იეჩი ციხეშია.
„ხელისუფლების წარმომადგენლები ხშირად მოდიან ჩემს ოჯახში და თვალს გვადევნებენ. მათ ბევრჯერ დამიბარეს და სიკვდილით დამემუქრნენ, თუ რწმენაზე უარს არ ვიტყოდი.“ – ამბობს მრუი.
„ვიეტნამელი ხალხის ევანგელური გაერთიანების“ ცნობით, ხუცესს ციხეში აწამებენ და სამედიცინო მომსახურებაზე უარს ეუბნებიან.
„სამხრეთ-აღმოსავლეთ აზიის ქვეყნებს შორის, ვიეტნამში ერთ-ერთი ყველაზე ცუდი მდგომარეობაა ადამიანთა უფლებების დაცვის მხრივ. ქვეყანაში ბევრი პოლიტიკური პატიმარია. გარდა ამისა, ვიეტნამში დაპატიმრებულებს ძალიან დიდი ხნით უსჯიან თავისუფლების აღკვეთას. მხოლოდ იმის გამო, რომ ადამიანები მშვიდობიანი ფორმით ითხოვენ საკუთარ სამოქალაქო და პოლიტიკურ უფლებებს ან გამოხატვის თავისუფლებას, 12-14 წლით უშვებენ ციხეში.“ – აცხადებს ფილ რობერტსონი, საერთაშორისო არასამთავრობო ორგანიზაცია Human Rights Watch-ის აზიის განყოფილების დირექტორის მოადგილე.
აშშ-ის რელიგიური თავისუფლების საერთაშორისო კომისიის მიერ 2020 წელს გამოქვეყნებულ ანგარიშში ნათქვამია, რომ ვიეტნამის ჩრდილოეთით და ცენტრალურ ნაწილში მცხოვრები მონტანიარდებისა და ჰმონგის ხალხები გამუდმებით იდევნებიან. მათ აპატიმრებენ ან აძევებენ თავიანთი რელიგიური კუთვნილების გამო.
ორგანიზაცია Open Doors USA-ის 2020 წლის ანგარიშის მიხედვით, ვიეტნამი მსოფლიოში რიგით 21-ე ქვეყანაა ქრისტიანთა დევნის თვალსაზრისით.