დევიდ ბაილი, კანადელ-ამერიკელი ქრისტიანი, რომელიც 2018 წელს იძულებული გახდა, თურქეთი დაეტოვებინა, ქვეყანას ადამიანის უფლებათა ევროპულ სასამართლოში უჩივის.
ბაილი კანადისა და ამერიკის მოქალაქეა, რომელიც 2000 წლის შემდეგ თურქეთში ცხოვრობდა და ქუჩაში ქადაგებდა სახარებას. ის რამდენჯერმე დააკავეს ქუჩაში ქადაგების დროს. 2018 წელს, მომდევნო დაკავებისას, ბაილს ქვეყნის დატოვება მოსთხოვეს. მისიონერი იძულებული გახდა, 2018 წლის 25 ოქტომბერს თურქეთიდან წასულიყო.
მიუხედავად იმისა, რომ თურქეთში მისიონერული საქმიანობა ლეგალურია, ხელისუფლების წარმომადგენელთა განცხადებით, ბაილი საფრთხეს უქმნიდა საზოგადოებრივ წესრიგსა და უსაფრთხოებას. ბაილს სამუდამოდ აუკრძალეს ქვეყანაში შესვლა, რის შესახებაც მან მხოლოდ მაშინ გაიგო, როდესაც თურქეთში თავის ოჯახთან დაბრუნება სცადა. ამჟამად, ბაილი გერმანიაში ცხოვრობს თავის ოჯახთან ერთად.
„მთავრობას არ უნდა, რომ აქ ვიყოთ, თურქეთში, მაგრამ უამრავ ადამიანს სურს ეს. ღმერთმა აქ მოგვიწოდა. ღმერთს სურს, რომ თურქმა ხალხმა მოისმინოს მის შესახებ.“ – ამბობს დევიდ ბაილი.
ქრისტიანულმა ორგანიზაცია Alliance Defending Freedom International-მა განაცხადა, რომ მან ბაილის სახელით შეიტანა საჩივარი ევროპის ადამიანის უფლებათა სასამართლოში.
„ყველას აქვს უფლება, აირჩიოს რელიგია და გამოხატოს ის როგორც საჯაროდ, ასევე პირისპირ. ადამიანის უფლებათა და ძირითად თავისუფლებათა დაცვის კონვენციის რატიფიცირებით, თურქეთმა თანხმობა განაცხადა რელიგიის თავისუფლების დაცვასთან დაკავშირებით. იმედი გვაქვს, რომ სასამართლო განიხილავს დევიდ ბაილის საქმეს და პასუხისმგებლობას დააკისრებს თურქეთს.“ – განაცხადა Alliance Defending Freedom International-ის დირექტორის მოადგილემ, რობერტ კლარკმა.
ადამიანის უფლებათა დამცველი საერთაშორისო ორგანიზაციის (Human Rights Watch) 2020 წლის ანგარიშის მიხედვით, ბოლო ოთხი წლის განმავლობაში თურქეთი მზარდ კრიზისს განიცდის ადამიანის უფლებათა დაცვის მხრივ.
დევნილ ქრისტიანთა უფლებადამცველი საერთაშორისო ორგანიზაცია Open Doors USA-ის ინფორმაციით, თურქეთი 25-ე ადგილზეა იმ 50 ქვეყანას შორის, სადაც ქრისტიანებისათვის რთული პირობებია შექმნილი.