25 ნოემბერს შეარაღებული ბრბო თავს დაესხა ქრისტიანთა სახლს და გვერდით მდებარე ეკლესიის შენობას. შემთხვევა ღამის საათებში ინდოეთის სოფელ ჩინგრვარამში მოხდა. ქრისტიანები წინა საღამოს ახალშობილის კურთხევის (მიძღვნის) ცერემონიალს აღნიშნავდნენ. როგორც წყაროები იუწყებიან, სახლში დაახლოებით 25 ოჯახის წევრსა და მათ მეგობრებს ეძინათ, ხოლო კიდევ დაახლოებით 25-30 ადამიანი ეკლესიის შენობაში იყო განთავსებული.
თავდამსხმელები მშვილდ-ისრებით, რკინის ძელებით, ბამბუკის ჯოხებითა და რკინის ნამგლებით იყვნენ შეიარაღებულნი და ბევრი მათგანი ნასვამიც იყო. ისინი ქრისტიანებს ადამიანების ქრისტიანობაზე მოქცევაში და ხმამაღალი მუსიკით ზეიმში ადანაშაულებდნენ. მათ დაწვეს ბიბლიები და ქრისტიანების კუთვნილი მოტოციკლეტები. ასევე გაანადგურეს შენახული ბურღულეული, დააზიანეს სახლი და მასში არსებული ქონება.
როგორც ერთ-ერთი დაშავებული და სახლის მეპატრონის შვილი, ლაქსმან მანდავი ამბობს, თავდამსხმელები ბავშვებს ხელებითა და ფეხებით სცემდნენ, დიდებს კი რკინის ძელებით. ის ასევე ამბობს, რომ მამამისი, 50 წლის მადვი მუკა, 2 თვის განმავლობაში იღებდა თავდამსხმელებისგან მუქარებს და ირწმუნება, რომ, სავარაუდოდ, ისინი 2 თვის განმავლობაში გეგმავდნენ ამ თავდასხმას.
როგორც თავად დაშავებულები ჰყვებიან, თავდასხმა დიდხანს გაგრძელდა. ბევრმა მათგანმა თავის შველა გაქცევით მოახერხა. მათ ჯუნგლებს შეაფარეს თავი, ბევრმა კი საკმაოდ სერიოზული შინაგანი თუ გარეგანი დაზიანებები მიიღო.
გადარჩენილთა თქმით, პოლიცია შემთხვევის ადგილას მხოლოდ დილით, 8 საათზე, მივიდა, მას შემდეგ, რაც თავდამსხმელები მიიმალნენ. 21 დაშავებული სასწრაფო დახმარების მანქანით სხვადასხვა ჰოსპიტალში გადაიყვანეს.
წყაროების ცნობით, დაშავებულთა რამდენიმე ოჯახი, რომელიც სოფელში ცხოვრობს, ახლა იმალება, რადგან თავდამსხმელებისგან მუქარა მიიღეს, რომ მათ მოკლავდნენ, იმის გამო, რომ 25 ნოემბრის თავდასხმის შესახებ პოლიციას შეატყობინეს.
ქრისტიანები ინდოეთის მოსახლეობის 2.3%-ს შეადგენენ. მართალია, ქვეყანაში რელიგიის თავისუფლება კონსტიტუციითაა დაცული, მაგრამ ინდოელ ქრისტიანებზე თავდასხმათა რიცხვი 2014 წლის შემდეგ მკვეთრად გაიზარდა, როცა ქვეყნის სათავეში ინდოეთის სახალხო პარტია მოექცა.
აღსანიშნავია, რომ ორგანიზაცია Open Doors-ის მონაცემების მიხედვით, მსოფლიოს ქვეყნებს შორის ინდოეთი მე-10 ქვეყანაა, სადაც ქრისტიანებს ძლიერ დევნიან.