ერთი კორეელი ქრისტიანი და სამი ინდოელი დააკავეს უტარ პრადეშის შტატში. მათ ბრალი დასდეს სხვა ადამიანების ქრისტიანობაზე თაღლითური გზით მოქცევის მცდელობაში. პოლიციის მტკიცებით, ისინი საკვებისა და სხვა დახმარების დარიგების მეშვეობით ცდილობდნენ ადამიანთა ქრისტიანობაზე მოქცევას პანდემიის გამო გამოცხადებული შეზღუდვების პირობებში.
ახალი, „სხვა რელიგიაზე მოქცევის საწინააღმდეგო“ კანონის თანახმად, რომელიც უტარ პრადეშის შტატში გასული წლის ნოემბერში ამოქმედდა, 19 დეკემბერს პოლიციამ დააპატიმრა სეულში მცხოვრები 50 წლის მი კიუნგ ლი და სამი ინდოელი. ამის შესახებ ინფორმაციას ავრცელებს რაჯ კუმარ მასიჰი, რომელიც ორგანიზებას უწევს ხალხისათვის სხვადასხვა სახის დახმარების მიწოდებას. რაჯ კუმარ მასიჰი უკვე ათასობით ადამიანს დაეხმარა მას შემდეგ, რაც გასული წლის მარტში ამის ოფიციალური ნებართვა აიღო.
ქრისტიანების დაკავება ერთ-ერთმა ბენეფიციარის, ანიტა შარმას განცხადების საფუძველზე მოხდა, რომელმაც განაცხადა, რომ მას და მეზობელ ქალს ფული შესთავაზეს ქრისტიანობის მიღების სანაცვლოდ. მასიჰი უარყოფს ბრალდებას და აცხადებს, რომ ფული არავისთვის შეუთავაზებიათ ქრისტიანობაზე მოქცევის სანაცვლოდ.
„ჩვენ გვაქვს ჩვენი ბენეფიციარების სახელები და ტელეფონის ნომრები, რომლებსაც შეუძლიათ დაადასტურონ, რომ არ გვითხოვია მათთვის რწმენისა თუ რელიგიის შეცვლა.“ – უთხრა მასიჰმა Morning Star News-ს.
გარდა ამისა, მასიჰი ამას ინდუისტი ნაციონალისტების მიერ კარგად დაგეგმილ შეთქმულებას უწოდებს, რომელშიც ახალი კანონი გამოყენეს.
ქრისტიანები ინდოეთის მოსახლეობის 2.3%-ს შეადგენენ. მართალია, ქვეყანაში რელიგიის თავისუფლება კონსტიტუციითაა დაცული, მაგრამ ინდოელ ქრისტიანებზე თავდასხმათა რიცხვი 2014 წლის შემდეგ მკვეთრად გაიზარდა, როცა ქვეყნის სათავეში ინდოეთის სახალხო პარტია მოექცა.
აღსანიშნავია, რომ ორგანიზაცია Open Doors-ის მონაცემების მიხედვით, მსოფლიოს ქვეყნებს შორის ინდოეთი მე-10 ქვეყანაა, სადაც ქრისტიანებს ძლიერ დევნიან.