როგორც Internation Christian Concern (ICC) ადგილობრივ პოლიციაზე დაყრდნობით აცხადებს, ინდონეზიაში ერთ-ერთმა ტერორისტულმა დაჯგუფება „ჯამაა ისლამიამ“ (JI) მთელი ქვეყნის მასშტაბით ბაზრობების ტერიტორიაზე საქველმოქმედო ყუთები განათავსა. ისინი იმედოვნებდნენ მოეტყუებინათ გულუბრყვილო მყიდველები, რათა მათ ფული შეეწირათ მათი ტერორისტული საქმიანობისთვის ისე, რომ ამის ეჭვიც არ გასჩენოდათ.
ინდონეზიის ნაციონალურმა პოლიციამ ეს აღმოჩენა 9 დეკემბერს, „ჯამაა ისლამიას“ 24 დაკავებული წევრის დაკითხვის შემდეგ გამოააშკარავა.
„შეგროვებული თანხები გამოიყენება ხალხის სირიაში გასაგზავნად, სამხედრო მომზადების დასაფინანსებლად, ძებნილი ტერორისტებისთვის დახმარების გასაწევად, რათა არ შეიპყრონ ისინი, და ასევე იარაღისა და ასაფეთქებელი ნივთიერებების შესაძენად.“ – განაცხადა ბრიგადირ-გენერალმა ავი სეტიონომ.
მან ასევე დაამატა, რომ არანაკლებ 13 000 ყუთი იყო განთავსებული სავარაუდო საქველმოქმედო ორგანიზაციის მიერ, რომელსაც BM ABA-ს ფონდი ეწოდება და რომლის ლიდერებიც „ჯამაა ისლამიას“ წინამძღოლები არიან.
ადგილობრივ წყაროებზე დაყრდნობით, ICC წერს, რომ ტერორისტებმა დააარსეს იურიდიული ორგანიზაციები ბავშვთა სახლების, არასამთავრობო და საქველმოქმედო ორგანიზაციების სახით და ასე ნიღბავდნენ თავიანთ საქმიანობასა და მიზნებს ბოლო ორი ათწლეულის განმავლობაში.
„ჯამაა ისლამია“ სამხრეთ-აღმოსავლეთ აზიაში არსებული ტერორისტული ორგანიზაციაა, რომელსაც „ალ-ქაიდასთან“ აქვს კავშირი.