ისრაელის სიძველეთა სამმართველომ (IAA) ოთხშაბათს განაცხადა რომაული ხანის ოქროს ბეჭდის აღმოჩენის შესახებ, რომლის ძვირფას ქვაზე გამოსახულია უფალი იესო ქრისტე, როგორც „მწყემსი კეთილი“.
ეს გახლავთ იესო ქრისტეს ადრეული მეტაფორული განსახიერების გამოსახულება. სამმართველოს მონეტარული განყოფილების კურატორის, ელენა სოკოლოვას განცხადებით, მსგავსი გამოსახულებანი, თავის დროზე, აღმოჩენილ იქნა რომის ქრისტიანულ კატაკომბებშიც.
ბეჭედი ორი ჩაძირული გემის ნაშთებს შორის იპოვეს ხმელთაშუა ზღვის სანაპიროზე, ქალაქ კესარიის პორტთან ახლოს. არქეოლოგების ვარაუდით, ისინი სხვადასხვა დროს ჩაიძირნენ. ერთი მათგანი, დაახლოებით, ქრისტეშობიდან მე-3 საუკუნით თარიღდება, ხოლო მეორე – ქრისტეშობიდან მე-14 საუკუნით.
ისრაელის სიძველეთა სამმართველოს საზღვაო განყოფილების არქეოლოგებმა არტეფაქტებს ისრაელის მთლიანი სანაპიროს გეგმური გამოკვლევების დროს მიაგნეს. ბეჭდის გარდა აღმოჩენილ იქნა რომაული ხანის სხვა ძვირფასი არტეფაქტებიც, მათ შორის არწივის ბრინჯაოს ფიგურა, თიხის ჭურჭელი და ზარები ბოროტი სულების შესაშინებლად. წყალში იპოვეს ვერცხლისა და ბრინჯაოს ასობით რომაული მონეტაც III საუკუნის შუა ხანებიდან და ვერცხლის მონეტები, რომლებიც XIV საუკუნეშია მოჭრილი.