ისრაელის სიძველეთა სამმართველოს (IAA) არქეოლოგებმა იერუსალიმის ძველ ნაწილში, დავითის ქალაქში, მომლოცველთა ბილიკთან მდებარე ნაგებობის საძირკველში იშვიათი ბრინჯაოს ზეთის ლამპარი აღმოაჩინეს, რომელშიც მოთავსებულია სელისგან დამზადებული ფითილი.
სანათი წვერიანი მამაკაცის გროტესკული სახის ნახევარს მიაგავს. ექსპერტების თქმით, იგი გამოიყენებოდა რელიგიური რიტუალებისას. ექსპერტები ვარაუდობენ, რომ ლამპარი რომაელი ხელოსნების ნახელავია და შთაგონებულია რომაული მითოლოგიით. როგორც ფიქრობენ, თავდაპირველად, ნათურა მიმაგრებული იყო ტაძრის კედელზე, რომელიც ინთებოდა ლოცვისა და სხვა რიტუალების დროს.
„მთელ მსოფლიოში აღმოჩენილია ათასობით ბრინჯაოს სანათი, რომელთაგან მრავალი რთული ფორმისაა, რაც რომაელი ხელოსნების ოსტატობაზე მიუთითებს. ეს კონკრეტული სანათი, რომელიც ახლა აღმოვაჩინეთ, ძალიან იშვიათია და მთელ მსოფლიოში მხოლოდ რამდენიმე მათგანია აღმოჩენილი.“ – განაცხადა დოქტორმა იუვალ ბარუქმა.
ლამპარი აღმოჩენილ იქნა შენობის საძირკველში, რომელიც იერუსალიმის უძველეს ნაწილში თითქმის 2000 წლის წინ აშენდა მეორე ტაძრის დანგრევის შემდგომ. შენობა, სადაც ლამპარი აღმოაჩინეს, აშენდა პირდაპირ პილიგრიმთა ბილიკის თავზე. იესოს დროს, პილიგრიმთა ბილიკი იყო გზა, რომელიც აკავშირებდა სილოამის აუზს ტაძრის მთასთან. აუზი კლდეში ნაკვეთი გახლდათ დავითის ქალაქის სამხრეთ კალთაზე. 70 წელს რომაელებმა ტაძარი დაანგრიეს; მათ სილოამის აუზისკენ მიმავალი გზა აინტერესებდათ, რათა წყალი მიეღოთ. არსებული ცნობებით, მოგვიანებით, რომაელებმა თავად ააშენეს ნაგებობა წყლის აუზის დასაცავად.
„ასეთი მასშტაბის მშენებლობა იერუსალიმის განადგურების შემდგომ პერიოდში მიუთითებს ამ ტერიტორიის მნიშვნელობაზე.“ – თქვა არი ლევიმ, ისრაელის სიძველეთა სამმართველოს დირექტორმა.