კალიფორნიაში მცხოვრებ 37 წლის ჯესი მარტინესს ბრალი ედება პალატაში მასთან ერთად მყოფი სხვა პაციენტის მკვლელობაში. გავრცელებული ინფორმაციით, მარტინესი კორონავირუსის გამო მკურნალობდა ლანკასტერში არსებულ Antelope Valley Hospital-ში. მასთან ერთად პალატაში იწვა ასევე კოვიდ-19-ით დაავადებული 82 წლის დევიდ ჰერნანდეს-გარსია. მარტინესი გააღიზიანა ხანდაზმული კათოლიკე ქრისტიანის, ჰერნანდეს-გარსიას ლოცვამ და რამდენჯერმე დაარტყა ჟანგბადის ბალონი. მიღებულ დაზიანებათა შედეგად, გარსია მეორე დღეს, 18 დეკემბერს, გარდაიცვალა.
Los Angeles Times-ის ინფორმაციით, მარტინესი პოლიციამ დააკავა და ახლა მას მკვლელობა და ხანდაზმულ ადამიანზე ძალადობა ედება ბრალად. მას შეიძლება 28 წლით თავისუფლების აღკვეთა ან სამუდამო პატიმრობა მიუსაჯონ.
ლანკასტერის მერი რ. რექს პერისი აცხადებს, რომ „შოკირებული და დამწუხრებულია“ ამ „უაზრო“ ძალადობის გამო.