გუშინ ღამით ისრაელის მიმართულებით ლიბანიდან სამი რაკეტა ისროლეს. რაკეტები დაუსახლებელ ტერიტორიაზე ჩამოცვივდა. თავიდან ქმედება ლიბანში მოქმედ ტერორისტულ დაჯგუფებად მიჩნეულ „ჰესბოლას“ მიეწერა, რომელიც ცნობილია ისრაელთან კონფლიქტური სიტუაციებით.
ლიბანის ტელევიზიის ცნობით, რაკეტები, შესაძლოა, ლიბანის ტერიტორიაზე მოქმედ პალესტინურ მცირე დაჯგუფებას ესროლა. ლიბანის უსაფრთხოების სამსახურის განცხადებით, რაკეტები პალესტინელი დევნილების დასახლებიდან გაისროლეს.
სარაკეტო თავდასხმა მას შემდეგ დაიწყო, რაც ისრაელმა „ჰამასის“ ულტიმატუმი, დაეტოვებინათ ალ-აქსას ტერიტორია სამართალდამცველებს, არ შეასრულა. ტერორისტულმა დაჯგუფებამ თავდაპირველად იერუსალიმის მიმართულებით 7 რაკეტა ისროლა, შემდეგ კი ცეცხლი გახსნა სხვა ქალაქების მიმართულებითაც. ისრაელზე სარაკეტო თავდასხმის გამო, ქვეყანაში საგანგებო მდგომარეობა გამოცხადდა. ღაზის სექტორიდან ისრაელის მიმართულებით 1000-ზე მეტი რაკეტა და საარტილერიო ჭურვი ისროლეს რამდენიმე დღის განმავლობაში.
შეგახსენებთ, რომ დაპირისპირება ებრაელებსა და პალესტინელებს შორის კვირაზე მეტია გრძელდება. დაპირისპირების მიზეზი ისრაელის ხელისუფლების მიერ პალესტინელი ოჯახების გასახლების შესახებ მიღებული გადაწყვეტილებაა. არეულობა იერუსალიმში ისრაელის უზენაესი სასამართლოს მიერ დაგეგმილი სხდომის წინ დაიწყო, რომელზეც შეიხ ჯარას რაიონიდან 70 პალესტინელი ოჯახის გასახლების საკითხი უნდა განხილულიყო, თუმცა ისრაელის გენერალური პროკურორის მოთხოვნით, სხდომა 30 დღით გადაიდო.
ალ-აქსას მეჩეთში, სადაც ათასობით პალესტინელი შეიკრიბა, მათ ისრაელის საწინააღმდეგო ფრაზების სკანდირება დაიწყეს, რასაც ადგილზე მობილიზებულ პოლიციასთან მწვავე დაპირისპირება მოჰყვა.