მაისის პირველი ხუთშაბათი აშშ-ის ლოცვის ეროვნული დღეა. ამ დღის თემა გახლდათ ციტატა ბიბლიიდან, კორინთელთა მიმართ მე-2 წერილის 3:17: „ხოლო უფალი სულია და სადაც უფლის სულია, იქ თავისუფლებაა.“ ღონისძიებები მთელი ქვეყნის მასშტაბით იყო დაგეგმილი და მასში უამრავი ადამიანი იღებდა მონაწილეობას, მათ შორის საჯარო მოხელეები და პოლიტიკოსებიც. „ლოცვის ეროვნული დღის“ ერთ-ერთი მთავარი მომხსენებელი ცნობილი მქადაგებელი ნიკ ვუიჩიჩი გახლდათ.
„ჩემთვის პატივია, რომ მე ვარ შეერთებული შტატების ლოცვის ეროვნული დღის მთავარი მომხსენებელი ტეხასის შტატში. ყოველივე იმის შემდეგ, რაც ბოლო ერთი წლის განმავლობაში ამერიკის შეერთებულ შტატებს თავს დაატყდა, მნიშვნელოვანია, რომ შევიკრიბოთ და ერთად ვილოცოთ. ღმერთს ვთხოვ, განკურნოს და დალოცოს ამერიკა.“ – წერს ნიკ ვუიჩიჩი საკუთარ „ფეისბუკგვერდზე“.
თავდაპირველად, 1775 წელს პირველმა კონტინენტურმა კონგრესმა მოიწვია ხალხი ლოცვის პირველი ეროვნული დღისათვის. 1863 წელს აბრაამ ლინკოლნმა განაცხადა ამ დღის აუცილებლობის შესახებ. 1952 წელს კი კონგრესმა ყოველწლიურ მოვლენად დაადგინა ლოცვის ეროვნული დღე. დადგენილებას, როგორც კანონს, ხელი მოაწერა პრეზიდენტმა ტრუმანმა. 1988 წელს კანონში შევიდა ცვლილება და მას ხელი მოეწერა პრეზიდენტ რეიგანის მიერ. კანონის მიხედვით, მაისის პირველი ხუთშაბათი განისაზღვრა ლოცვის ეროვნულ დღედ.
„უფალო, მზერას აღვაპყრობთ და ვხედავთ მილიარდობით ვარსკვლავს, რომელიც შექმენი და გადიდებთ. გარშემო ვიყურებით და ვხედავთ მილიარდობით ადამიანს, რომელთაგან ყველა საოცრად და განსაკუთრებულად გყავს შექმნილი და მადლობას გიხდით. გარემოგვიცავი შენი სულით და გაგვაერთიანე ერთ ოჯახად, უფალო. გმადლობთ, რომ პირველად შენ შეგვიყვარე. გმადლობთ, რომ ისე შეიყვარე კაცობრიობა, რომ წარმოგზავნე შენი ძე, რათა დაგეხსენით.
უფალო იესო, მხოლოდ შენში გვაქვს საუკუნო და უხვი სიცოცხლე. გმადლობთ, რომ გვასწავლი, როგორ გვიყვარდეს და როგორ ვცხოვრობდეთ ერთგული და ნაყოფიერი ცხოვრებით. შენს სიკვდილში, აღდგომასა და ამაღლებაში ხარ ჩვენი უფალი, ჩვენი სიყვარული, ჩვენი სიცოცხლე და ჩვენი თავისუფლება. შენ მოხვედი ‘გულგატეხილთა ჭრილობების შესახვევად, რომ გამოუცხადო ტყვეებს თავისუფლება და პატიმართ – ბორკილების ახსნა’. შენ გაგვათავისუფლე იმ სირცხვილისა და სასჯელისგან, რომელსაც ჩვენი ცოდვების გამო ვიმსახურებდით. გაგვათავისუფლე, რათა გვეცხოვრა ისეთი ცხოვრებით, როგორისთვისაც შექმენი ჩვენი ერი.“ – ასე ჟღერს „ლოცვის დღის“ ერთსულოვანი ვედრება ღმერთისადმი ამერიკელი ერისთვის.