პარასკევს, ქალაქ კონფლან-სენტ-ონორინში, ისტორიისა და გეოგრაფიის მასწავლებელი, სამუელ პეტი განსაკუთრებული სისასტიკით მოკლა თავდამსხმელმა. უცნობი, სკოლის მახლობლად, ქუჩაში დაესხა თავს მასწავლებელს და დიდი დანით თავი მოჰკვეთა. პოლიცია მაშინვე დაედევნა მას და სასიკვდილოდ დაჭრა მას შემდეგ, რაც დამნაშავემ უარი თქვა დანებებაზე.
სამუელ პეტიმ, დაახლოებით, ათი დღის წინ, თავის გაკვეთილზე წამოიწყო საუბარი აზრის გამოხატვის თავისუფლების შესახებ, წინასწარმეტყველ მუჰამედის კარიკატურებთან დაკავშირებით. შეგახსენებთ, რომ ამ კარიკატურების გამოქვეყნების გამო, 2015 წელს, სატირული ყოველკვირეული ჟურნალის „შარლი ებდოს“ რედაქციაში შეიარაღებული მუსლიმანები შეიჭრნენ და 12 ადამიანი მოკლეს.
ფრანგი მასწავლებლის მკვლელობას „შარლი ებდოს“ რედაქცია „ტვიტერზე“ ასე გამოეხმაურა: „შეუწყნარებლობამ ახალ ზღვარს მიაღწია და როგორც ჩანს, არაფრის წინაშე არ აპირებს გაჩერებას, რათა ტერორიზმი მოახვიოს თავს ჩვენს ქვეყანას.“
საფრანგეთის პრეზიდენტი, სამუელ მაკრონი დანაშაულის ადგილზე მივიდა და მომხდარს „ისლამისტური ტერორისტული თავდასხმა“ უწოდა.