მსოფლიოს მართლმადიდებლური ეკლესიების უმრავლესობა შობას ახალი სტილით, 25 დეკემბერს აღნიშნავს. როგორც ცნობილია, 16 ავტოკეფალიური ეკლესიიდან 10, უძრავ საეკლესიო დღესასწაულებს ახალი კალენდარული სტილით ზეიმობს, ხოლო მოძრავს – ძველი კალენდარული სტილით.
ექვსი მართლმადიდებლური ეკლესია (იერუსალიმის, რუსეთის, საქართველოს, სერბეთის, პოლონეთის, უკრაინის) კი იულიუსის კალენდრის მიხედვით შობას 7 იანვარს აღნიშნავს.
25 დეკემბერს ქრისტეშობას 10 ავტოკეფალიური, მართლმადიდებლური ეკლესია ქრისტიანების უმრავლესობასთან ერთად იზეიმებს. ესენი არიან კონსტანტინოპოლის, ალექსანდრიის, ანტიოქიის, საბერძნეთის, კვიპროსის, რუმინეთის, ბულგარეთის, ალბანეთის, ჩეხეთ-სლოვაკეთისა და ამერიკის ეკლესიები.
საქართველოში 25 დეკემბერს შობას კათოლიკური ეკლესია და პროტესტანტული ეკლესიების უმრავლესობა ზეიმობს.
შეგახსენებთ, რომ საქართველოს მთავრობამ კომენდანტის საათის შეზღუდვა მხოლოდ 6 იანვრის ღამეს მოხსნა. ხელისუფლების თქმით, ერთჯერადი საშობაო საშვების მისაღებად სახელმწიფოსთვის ქრისტიანულ კონფესიებს (მართლმადიდებლური ეკლესიის გარდა) დამსწრეთა სიები უნდა წარედგინათ. ეკლესიებმა უარი განაცხადეს მრევლის პირადი მონაცემების გაცემაზე და საშვების შეთავაზებაზე, ამიტომ კათოლიკურ და პროტესტანტულ ტაძრებში ღვთისმსახურება ძირითადად ღამის თევით, მრევლის გარეშე ან კომენდანტის საათის დადგომამდე შედგება.