13 მაისს, ისრაელის თავდაცვის ძალების გენერალურ შტაბს ღაზის სექტორში შესაძლო სახმელეთო შეჭრის გეგმა დასამტკიცებლად წარუდგინეს. თავდაცვის ძალებმა ღაზის სექტორიდან 4 კილომეტრის რადიუსში მცხოვრებ ისრაელის მოქალაქეთათვის თავშესაფარ ბუნკერებში შესვლის ბრძანება გასცა. დიდი სამხედრო ოპერაციების დაწყებასთან ერთად, აშშ-მა ისრაელიდან პენტაგონის 120 თანამშრომლის ევაკუაცია დაიწყო.
ფართომასშტაბიანი სპეცოპერაციის დაწყებასთან დაკავშირებით, სიტყვა წარმოთქვა ისრაელის პრემიერ-მინისტრმა, ბენიამინ ნეთანიაჰუმ:
„აუტანელია ის, რაც ისრაელის ქალაქებში ხდება ბოლო დღეებში. ჩვენ ვნახეთ, რომ არაბებმა სინაგოგებს და მანქანებს ცეცხლი წაუკიდეს, დაზარალდნენ მშვიდობიანი და უდანაშაულო მოქალაქეები. ეს ანარქიაა და ჩვენ ამას არ შევეგუებით. არაფერი არ ამართლებს ამას და ამაზე მეტსაც გეტყვით, გაუმართლებელია ებრაელების მიერ არაბების ლინჩის წესით გასამართლება ისევე, როგორც არაბების მიერ ებრაელების. ჩვენ არ დავუშვებთ ამას. ეს ძალადობაა! ჩვენ აღვადგენთ ძალაუფლებას და მმართველობას ისრაელის ყველა ქალაქში, მათ შორის შერეულ ქალაქებში…
ისრაელის მოქალაქეებს ვეუბნები: არ მაინტერესებს, თუ სისხლი გიდუღთ ძარღვებში. კანონს საკუთარ ხელში ვერ აიღებთ. არ შეიძლება, რიგითი არაბი მოქალაქე ლინჩის წესით ჩაქოლოთ და პირიქით. ჩვენ ორ ფრონტზე ვიბრძვით. ერთ ფრონტზე ‘ჰამასის’ წინააღმდეგ და ჩვენ ყველანი უნდა გავერთიანდეთ ამ ომში, რადგან ‘ჰამასის’ ნასროლი რაკეტები ისრაელში მცხოვრებ ებრაელებს და არაბებს თანაბრად მოხვდათ. მეორე ფრონტი ისრაელის ქალაქებია. ვიმეორებ, რაც დღეს ვთქვი, ჩვენ დავეხმარებით პოლიციას, სასაზღვრო და სხვა უსაფრთხოების ძალებს, რათა ისრაელის ქალაქებში აღვადგინოთ წესრიგი და სამართალი.
მოდით, ერთად დავდგეთ, რათა აღმოვფხვრათ ანარქია, აღვადგინოთ უსაფრთხოება და მშვიდობა, რომელსაც ჩვენ ყველა ვიმსახურებთ.“
სარაკეტო თავდასხმა მას შემდეგ დაიწყო, რაც ისრაელმა „ჰამასის“ ულტიმატუმი, დაეტოვებინათ ალ-აქსას ტერიტორია სამართალდამცველებს, არ შეასრულა. ტერორისტულმა დაჯგუფებამ თავდაპირველად იერუსალიმის მიმართულებით 7 რაკეტა ისროლა, შემდეგ კი ცეცხლი გახსნა სხვა ქალაქების მიმართულებითაც. ისრაელზე სარაკეტო თავდასხმის გამო, ქვეყანაში საგანგებო მდგომარეობა გამოცხადდა. ღაზის სექტორიდან ისრაელის მიმართულებით 1000-ზე მეტი რაკეტა და საარტილერიო ჭურვი ისროლეს რამდენიმე დღის განმავლობაში.
შეგახსენებთ, რომ დაპირისპირება ებრაელებსა და პალესტინელებს შორის კვირაზე მეტია გრძელდება. დაპირისპირების მიზეზი ისრაელის ხელისუფლების მიერ პალესტინელი ოჯახების გასახლების შესახებ მიღებული გადაწყვეტილებაა. არეულობა იერუსალიმში ისრაელის უზენაესი სასამართლოს მიერ დაგეგმილი სხდომის წინ დაიწყო, რომელზეც შეიხ ჯარას რაიონიდან 70 პალესტინელი ოჯახის გასახლების საკითხი უნდა განხილულიყო, თუმცა ისრაელის გენერალური პროკურორის მოთხოვნით, სხდომა 30 დღით გადაიდო.
ალ-აქსას მეჩეთში, სადაც ათასობით პალესტინელი შეიკრიბა, მათ ისრაელის საწინააღმდეგო ფრაზების სკანდირება დაიწყეს, რასაც ადგილზე მობილიზებულ პოლიციასთან მწვავე დაპირისპირება მოჰყვა.