ორი რესპუბლიკელი სენატორი, ჯონი ერნსტი და ჩაკ გრასლი პრეზიდენტ ტრამპს სთხოვს, დაიცვას ნიგერიაში მცხოვრები ქრისტიანები, რომლებიც სასტიკად იდევნებიან ისლამისტური დაჯგუფებების მიერ. სენატორებმა ცოტა ხნის წინ წერილი გაუგზავნეს პრეზიდენტს, სადაც ისინი სთხოვენ ტრამპს, რომ ნიგერიაში საგანგებო წარმომადგენელი გაგზავნოს, რათა ბოლო მოეღოს ქრისტიანთა გენოციდს აფრიკის ამ ქვეყანაში.
წერილში სენატორები მიუთითებენ, რომ ნიგერიაში უკვე 40 ათასი ქრისტიანის სიკვდილი უკავშირდება ბოკო ჰარამის დაჯგუფებას. ბოკო ჰარამის გარდა ქრისტიანებს დევნიან და ხოცავენ ასევე ფულანის მწყემსთა დაჯგუფების წევრებიც.
ორი წლის წინ პრეზიდენტმა ტრამპმა სთხოვა ნიგერიის პრეზიდენტს მუჰამადუ ბუჰარის, დაეცვა „ნებისმიერი მრწამსის მქონე უდანაშაულო მოქალაქეები“, თუმცა სენატორებს სურთ, რომ უფრო მეტი გაკეთდეს ქრისტიანების სიცოცხლის დასაცავად.
შეგახსენებთ, რომ ნიგერიის სამოქალაქო საზოგადოების ორგანიზაციის შეფასებით, 2020 წლის დასაწყისიდან დღემდე ქვეყანაში, დაახლოებით, 620 ქრისტიანი მოკლეს და ასობით სახლი და ეკლესია დაანგრიეს ფულანის რადიკალური დაჯგუფების წევრებმა და ისლამისტმა ტერორისტებმა.
ორგანიზაციის Open Doors USA’s 2020 წლის ანგარიშის მიხედვით, ნიგერია მე-12 ადგილზეა მსოფლიოში ქრისტიანთა დევნის მხრივ.