კვირას, 30 იანვარს, ორმა უცნობმა პირმა ცეცხლსასროლი იარაღიდან გასროლით მოკლა პაკისტანელი მღვდელი, როცა იგი ღვთისმსახურებიდან სახლში ბრუნდებოდა საკუთარი ავტომობილით. დაიჭრა მის გვერდით მყოფი მღვდელი პატრიკ ნაეემი. შემთხვევა პაკისტანის ქალაქ პეშავარში მოხდა.
75 წლის მღვდელი უილიამ სირაჯი მსახურობდა ყველა წმიდის ეკლესიაში (All Saints Church), რომელიც მეთოდისტურ და ანგლიკანურ ეკლესიებს აერთიანებს.
„ჩვენ მოვითხოვთ სამართალს და ქრისტიანთა დაცვას პაკისტანის მთავრობისაგან.“ – დაწერა „ტვიტერზე“ ეპისკოპოსმა აზად მარშალმა, პაკისტანის ეკლესიის წარმომადგენელმა.
კენტერბერის არქიეპისკოპოსი ჯასტინ უელბიც გამოეხმაურა ამ ტრაგედიას: „ვლოცულობთ, რომ ქრისტეს სამართლიანობის, იმედისა და მშვიდობის სინათლე მოეფინოთ ჩვენს დებსა და ძმებს პაკისტანის ეკლესიაში“.
პოლიციის ოფიცერმა, აბას აჰსანმა მომხდარს „ტერორისტული აქტი“ უწოდა და განაცხადა, რომ დაიცავენ უმცირესობებს.
შეგახსენებთ, რომ ქალაქ პეშავარში 2013 წელს, სულ მცირე, 81 ქრისტიანი დაიღუპა მას შემდეგ, რაც ორმა თვითმკვლელმა ტერორისტმა თავი აიფეთქა.