პაკისტანელი ქრისტიანი ქალი მოკლეს მას შემდეგ, რაც მან უარი თქვა ისლამზე მოქცევასა და მუსლიმანი კაცის ცოლობაზე. 24 წლის სონია ბიბის რამდენჯერმე ესროლეს თავში. შემთხვევა 30 ნოემბერს, პაკისტანში, რავალპინდში ავტობუსის გაჩერებასთან მოხდა.
პოლიცია ეძებს ეჭვმიტანილს, მუჰამად შეჰაზადს, ხოლო მისი თანამზრახველი უკვე დაკავებულია. ამის შესახებ ინფორმაციას ავრცელებს Aid to the Church in Need-ი, კათოლიკური საერთაშორისო საქველმოქმედო ორგანიზაცია.
ვრცელდება ინფორმაცია იმის შესახებ, რომ სონია ბიბიმ რამდენიმე დღით ადრე უთხრა უარი ქორწინებაზე მუსლიმან მამაკაცს, სანამ მოკლავდნენ. Aid to the Church in Need-ის ნაციონალური დირექტორი, ნევილ კირკე-სმიტი აცხადებს: „სონიას მკვლელობა ტრაგედიაა. ეს თვალსაჩინოდ გვიჩვენებს, რომ გოგონებსა და ქალებს სასიკვდილო საფრთხე ემუქრებათ, განსაკუთრებით მათ, ვინც ქრისტიანია ან სხვა უმცირესობის წარმომადგენელი. ისინი განიცდიან ზეწოლას იმასთან დაკავშირებით, რომ საკუთარ რწმენაზე უარი თქვან და იძულებით გათხოვდნენ.“
კიდევ ერთი ქრისტიანი გოგონა, 14 წლის მაირა შაჰბაზი, ოჯახთან ერთად იმალება, რადგან მათ სიკვდილით ემუქრებიან. გოგონა მუსლიმან კაცს გამოექცა, რომელმაც მას დაქორწინება და ისლამზე მოქცევა აიძულა. ორგანიზაცია Aid to the Church in Need-ი გაერთიანებული სამეფოს პრემიერ-მინისტრს, ბორის ჯონსონს სთხოვს, თავშესაფარი მისცეს მაირა შაჰბაზს.