უცნობი მამაკაცი, რომელმაც ნიუ-იორკის საკათედრო ტაძრის კიბეებზე ტაძრის გუნდის მიერ საშობაო საგალობლების შესრულების დასასრულს ცეცხლი გახსნა, პოლიციამ ადგილზე მოკლა.
გუშინ წმინდა იოანე ღვთისმეტყველის საკათედრო ტაძრის კიბეზე ტაძრის გუნდი საშობაო საგალობლებს ასრულებდა, რომ აშშ-ის დროით 16:00 საათზე მოულოდნელად სროლა ატყდა და საგალობლების მოსასმენად შეკრებილი ხალხი პანიკამ მოიცვა.
ადგილზე მყოფმა პოლიციამ, რომელიც შეკრებილი ხალხის მიერ პანდემიისას დაწესებული ზომების დაცვას ადევნებდა თვალყურს, სწრაფად მოახდინა რეაგირება და უცნობი, რომელიც შეიარაღებული იყო, სასიკვდილოდ დაჭრა. იგი კრიტიკულ მდგომარეობაში გადაიყვანეს საავადმყოფოში, სადაც, გავრცელებული ინფორმაციით, მალევე გარდაიცვალა.
„ყველაფერი ძალიან ლამაზი იყო, შემდეგ კი უცნობმა კაცმა სროლა დაიწყო. მსროლელს შეიძლებოდა ბევრი ადამიანი მოეკლა. აქ ასეულობით ადამიანი იყო შეკრებილი და მან არანაკლებ 20-ჯერ ისროლა“, – განაცხადა „ნიუ-იორკ თაიმსთან“ ნიუ-იორკის საეპისკოპოსო ეპარქიის მთავარი ეკლესიის პრესმდივანმა ლიზა შუბერტმა.
გაურკვეველია, უცნობი დამიზნებით ისროდა თუ ჰაერში. პოლიციის ცნობით, შეკრებილთა შორის დაჭრილები არ არიან.
შეგახსენებთ, რომ ნიუ-იორკის საკათედრო ტაძარი მსოფლიოში ერთ-ერთი უდიდესია. მშენებლობა 1892 წელს დაიწყო და დღემდე არ დასრულებულა.