პაკისტანის ქალაქ კარაჩიში გამოჩნდა პლაკატები, რომელიც 10 მილიონ რუპიას (დაახლოებით 70,000 $) სთავაზობს მას, ვინც მოკლავს რადიკალი ისლამისტების მიერ ღვთის გმობაში დადანაშაულებულ პაკისტანელ ქრისტიანს.
ტაილანდში მცხოვრები პაკისტანელი ქრისტიანი აქტივისტი ფარაზ პერვაიზი დადანაშაულებულია სოციალურ ქსელებში ანტიისლამური კონტენტის გამოქვეყნების გამო.
„წყეული ღვთისმგმობელი ფარაზ პერვაიზის თავისთვის დაწესებული თანხა წარმოადგენს 10 მილიონს. ერთადერთი სასჯელი წინასწარმეტყველის შეურაცხყოფისთვის თავის მოკვეთაა.“ – ნათქვამია პლაკატში, რომელზეც განთავსებულია ფარაზის ფოტო.
ისლამურმა ორგანიზაციამ Jamaat Ahle Sunnat – მა პლაკატზე ასევე თავისი საკონტაქტო ტელეფონის ნომრები და მისამართი განათავსა.
თავად პერვაიზს პლაკატი ტვიტერზე თავისი გვერდის პროფილის ფოტოდ აქვს დაყენებული.
პერვაიზს 2013 წლიდან ემუქრებიან, მას შემდეგ, რაც ქრისტიანთა დასაცავად გამოვიდა. ეს მოხდა მაშინ, როდესაც მუსლიმანთა ბრბომ იერიში მიიტანა პაკისტანის ქალაქ ლაჰორის ქრისტიანებით დასახლებულ ნაწილზე და გაანადგურა 150-ზე მეტი სახლი და 2 ეკლესია. ფარაზ პერვაიზი სათავეში ჩაუდგა საპროტესტო აქციებს და ითხოვდა პოლიციის მხრიდან შესაბამის რეაგირებას. გარდა ამისა, მას მიჰყავდა ბლოგი, სადაც დაობდა ისლამურ პოლიტიკასა და თეოლოგიის სისწორეზე, წარმოადგენდა ყურანის საკუთარ განმარტებებს და აკრიტიკებდა წინასწარმეტყველ მუჰამედს.
2014 წელს ის გაიქცა პაკისტანიდან მას შემდეგ, რაც რადიკალი მუსლიმანები განსაკუთრებით განრისხდნენ მასზე ანტიისლამური პროპაგანდის გამო სოციალურ მედიაში. აღსანიშნავია, რომ სხვადასხვა დროს მისი მკვლელობისთვის სხვადასხვა ჯილდო წესდებოდა.
2019 წელს ფარაზ პერვაიზი, რომელიც 3 შვილის მამაა, ოჯახთან ერთად ბანგკოკის შემოგარენში გასაიდუმლოებულ ადგილას გადავიდა საცხოვრებლად. ეს მას შემდეგ მოხდა, რაც ინტერნეტში პაკისტანელი ლტოლვი მუსლიმანის მიერ გაკეთებული ვიდეო გავრცელდა. ვიდეოში ის მსოფლიოში ყველა მუსლიმს მოუწოდებდა გამგზავრებულიყო ბანგკოკში და მოეკლა ფარაზ პერვაიზი.
აღსანიშნავია, რომ ორგანიზაცია Open Doors -ის 2020 წლის ანგარიშის მიხედვით პაკისტანი მე-5 ადგილს იკავებს იმ ქვეყნების სიაში, სადაც ქრისტიანები ყველაზე მეტად იდევნებიან. პაკისტანში ღვთისგმობა სიკვდილით ისჯება.