მრავალი ქვეყნის სამართალდამცველები მოუწოდებენ მსოფლიოს, რომ ისლამური სახელმწიფოს მებრძოლი წევრები ისევე გასამართლდნენ, როგორც ნაცისტები გაასამართლეს ნიურნბერგში.
როგორც ჩრდილოეთ და აღმოსავლეთ სირიის ავტონომიური ადმინისტრაციის (AANES) მაღალი რანგის წარმომადგენელი ბედრან ცია კურდი აცხადებს, ისლამური სახელმწიფოს (ISIS) ბრძოლაში დამარცხების შემდეგ, ქურთების მიერ კონტროლირებად ჩრდილოეთ და აღმოსავლეთ სირიის ავტონომიური ადმინისტრაციის ტყვეობაში ISIS-ის 10,400 მებრძოლი უცხო ქვეყნის მოქალაქე ჰყავს. მან ეს 9 დეკემბერს „Universal Rights“-ის ვირტუალური ღონისძიების დროს განაცხადა. ქვეყნების უმეტესობა არ მიიღებს მათ უკან. ამჟამად არ არსებობს საერთაშორისო სასამართლო, რომელშიც შესაძლებელი იქნებოდა მათი გასამართლება.
„ISIS დევნიდა იეზიდებს, ქრისტიანებს, არაბებს, ქურთებს და საშინელ სისასტიკეს სჩადიოდა ქალებისა და ბავშვების სექსუალური დამონების ჩათვლით. ჩვენ დიდი ხანია, მოვუწოდებთ მსოფლიოს საერთაშორისო ტრიბუნალების ან ნიურნბერგის მსგავსი – შერეული ტიპის ეროვნულ-საერთაშორისო ტრიბუნალების შექმნისკენ ჩრდილოეთ და აღმოსავლეთ სირიის ავტონომიური ადმინისტრაციის რეგიონებში, რათა ყველა დამნაშავე პასუხისგებაში მიეცეს ჩადენილ დანაშაულებათა გამო.“ – ამბობს კურდი.
სამართალდამცველების თქმით, ISIS-ის ქმედებები ტერორიზმის ჩარჩოებსაც სცილდება, რადგან მათ ასევე გენოციდი მოუწყვეს ადამიანთა ისეთ ჯგუფებს, როგორებიც არიან იეზიდები, ქრისტიანები, შიიტი მუსლიმანები და გარდა ამისა, ჩაიდინეს სხვა ძალიან მძიმე დანაშაულებანი, ადამიანთა უფლებების დარღვევის თვალსაზრისით.
როგორც აშშ-ის სისხლის სამართალწარმოების გლობალური სამმართველოს განსაკუთრებულ დავალებათა ელჩმა, მორს ჰ. ტანმა განაცხადა, აშშ სათავეში ჩაუდგა ISIS-ის სამართლებრივ დევნას და დაიბრუნა ტერორისტული ორგანიზაციის 28 მებრძოლი – შეერთებული შტატების მოქალაქე, რომლებიც სასამართლოს წინაშე წარდგნენ.
„დროა, ქვეყნებმა დაიბრუნონ და პასუხისგებაში მისცენ თავიანთი მოქალაქეები, რომლებიც ISIS-ის მხარეს იბრძოდნენ. ადამიანის უფლებათა საყოველთაო დეკლარაცია, გარკვეულწილად, ჰოლოკოსტის საპასუხოდ შეიქმნა. მსოფლიოს ზოგიერთ ნაწილში კი დღეს კაცობრიობა, როგორც ჩანს, უკან – სიბნელისა და ძალადობისკენ მიდის.“ – აცხადებს მორს ტანი.
ამ ეტაპზე არ არსებობს რაიმე სახის საერთაშორისო ტრიბუნალი, რომელიც გაასამართლებდა ISIS-ის მებრძოლებს მათ მიერ ჩადენილ მძიმე დანაშაულთა გამო. როგორც ChristianPost-ი წერს, AANES-ის ქურთული ხელისუფლება ცდილობდა, შეექმნა სამართლის საერთაშორისო ორგანო, მაგრამ ამ იდეას ჯერ არ მიუღია საერთაშორისო მხარდაჭერა.