„სატანისტური ტაძარი“ სარეკლამო კომპანიას რელიგიური დისკრიმინაციისთვის უჩივის

CBN News-ის მიხედვით, ორგანიზაცია „სატანისტური ტაძარი“ არკანზასის სასამართლოში უჩივის სარეკლამო კომპანიას Lamar Advertising და მას რელიგიურ დისკრიმინაციაში ადანაშაულებს. ორგანიზაციაში ამბობენ, რომ კომპანია უარს აცხადებს მათი სარეკლამო დაფების დადგმაზე არკანზასსა და ინდიანაში.

სარეკლამო დაფები უნდა დაედგათ სიცოცხლის უფლების მომხრე ორსულობის ცენტრებთან ახლოს. ერთ-ერთ სარეკლამო დაფაზე გამოსახული უნდა ყოფილიყო ნამცხვრის გათქვეფილი მასა გამოცხობამდე ტექსტით: „ეს არ არის ნამცხვარი” და იქვე განაყოფიერებული კვერცხუჯრედი ტექსტით: „ეს არ არის ბავშვი“, სხვაზე კი – ქალი, რომელსაც პატარა ადოლფ ჰიტლერი უჭირავს ხელში და ახლავს წარწერა: „რა იქნებოდა, აბორტი რომ არჩევითი გამოსავალი ყოფილიყო?“

იქიდან გამომდინარე, რომ აშშ-ის ზოგიერთ შტატში აბორტი რეგულირდება კანონით, ორგანიზაცია „სატანისტურმა ტაძარმა“ აბორტს რელიგიური რიტუალი უწოდა და აბორტის მსურველ ქალებს მარტივი გამოსავალი შესთავაზა: თუ ქალი შეასრულებს აბორტს, როგორც რიტუალს, შეუძლია მოითხოვოს გამონაკლისის დაშვება რელიგიურ საფუძველზე. ეს მას გაათავისუფლებს იმ სავალდებულო მოსაცდელი დროისგან, რასაც მოითხოვს ზოგიერთი შტატი აბორტის ჩატარებამდე. ეს მოთხოვნა ჯანმრთელობის მდგომარეობის შემოწმება და კონსულტაციებზე სიარულია.

სარეკლამო კომპანიამ უარი თქვა ამ დიზაინის მქონე ბანერების განთავსებაზე და განაცხადა, რომ ეს შეურაცხმყოფელი და მცდარია. „სატანისტურმა ტაძარმა“ კი საპასუხოდ თქვა, რომ სატანისტური რიტუალი რელიგიური უფლებაა და უნდა დაიშვას გამონაკლისი შტატის კანონებისა და რეგულაციების მიუხედავად.    

შეგახსენებთ, რომ ორგანიზაცია „სატანისტური ტაძარი“ 2012 წელს დაარსდა და 300 ათას წევრზე მეტს ითვლის.