შაგუფტა კაუსარიმ და მისმა მეუღლემ, შაფქატ ემანუელმა ბოლო შვიდი წელი ციხეში გაატარეს სასიკვდილო განაჩენის მოლოდინში. საბოლოოდ, ახლახან პაკისტანის სასამართლომ ისინი გაამართლა და სასჯელი მოუხსნა.
ეს არის ღარიბი ქრისტიანული ოჯახი, რომელიც ცხოვრობდა პაკისტანის ცენტრალურ ნაწილში მდებარე ქალაქ გოჯრაში. წყვილს ოთხი შვილი ჰყავს. ცოლ-ქმარი 2014 წელს დაადანაშაულეს ადგილობრივი იმამისათვის მკრეხელური ტექსტური შეტყობინებების გაგზავნაში, სადაც შეურაცხყოფილი იყო წინასწარმეტყველი მუჰამედი. ნომერი შაგუფტა კაუსარის სახელზე იყო რეგისტრირებული. ღვთის გმობა პაკისტანში სიკვდილით ისჯება და მიუხედავად იმისა, რომ ამის გამო ჯერ არავინ დაუსჯიათ სიკვდილით, ათეულობით ადამიანი იქნა მოკლული ბრბოს მიერ ღვთის გმობის ბრალდების გამო.
შაგუფტას ძმამ BBC-ს უთხრა, რომ ეჭვი ეპარება იმასთან დაკავშირებით, ცოლ-ქმარს საერთოდ თუ შეეძლო ტექსტური შეტყობინებების დაწერა და გაგზავნა, რადგან მათ საამისო განათლება არ აქვთ. შაგუფტა დარაჯად მუშაობდა ქრისტიანულ სკოლაში, ხოლო მისი ქმარი ნაწილობრივ პარალიზებულია.
მათმა დამცველმა, საიფ ულ მელუკიმ, რომელიც ასევე ასია ბიბის (ქალი, რომელსაც ღვთის გმობის გამო სასიკვდილო განაჩენი ჰქონდა გამოტანილი და რომელიც რამდენიმე წლის შემდეგ გაათავისუფლეს) დამცველი გახლდათ, განაცხადა, რომ წყვილის წინააღმდეგ წარმოდგენილი მტკიცებულებანი გაყალბებული იყო.
„ბედნიერი ვარ, რომ მივაღწიე სამართლიანობას ამ წყვილისთვის.“ – განაცხადა მალუკმა ICC-სთან საუბრისას.
ადამიანთა უფლებების დამცველები აცხადებენ, რომ ღვთის გმობაში დადანაშაულება ხშირად გამოიყენება პირადი ანგარიშების გასასწორებლად ან რელიგიურ უმცირესობათა შესავიწროებლად.
ორგანიზაცია „Open Doors“-ის მონაცემებით, ქრისტიანთა დევნის კუთხით პაკისტანი მე-5 ადგილზეა მსოფლიოში.