გუშინ საღამოს, შეიარაღებულმა პირებმა თავდასხმა განახორციელეს ავსტრიის დედაქალაქის ცენტრის ექვს სხვადასხვა ადგილზე. სროლა ვენის ცენტრალური სინაგოგის ახლოს დაიწყო. უახლესი მონაცემების მიხედვით, დაღუპულია 3, ხოლო მძიმედ დაჭრილია 17 ადამიანი, მათ შორის პოლიციის ოფიცერი. ერთ-ერთი ეჭვმიტანილი პოლიციის თანამშრომელმა სპეცოპერაციის მსვლელობისას მოკლა.
თავდასხმა მოხდა რამდენიმე საათით ადრე, ვიდრე ავსტრიის მთავრობა ახალ შეზღუდვებს გამოაცხადებდა კორონავირუსის უფრო მეტად გავრცელების თავიდან ასარიდებლად. უამრავი ადამიანი იმყოფებოდა გარეთ, ბარებსა და რესტორნებში, შუაღამისას მათ დაკეტვამდე.
ავსტრიის კანცლერმა, სებასტიან კურტცმა მომხდარი „ტერორისტულ თავდასხმად“ შეაფასა, ხოლო ავსტრიის შინაგან საქმეთა მინისტრმა, კარლ ნიჰამერმა მოკლულს „ისლამისტი ტერორისტი“ უწოდა. მან ასევე განაცხადა, რომ ის ისლამური სახელმწიფოს გულშემატკივარი იყო და მისი ბინის ჩხრეკისას ამოიღეს შესაბამისი ვიდეომასალა. მინისტრმა მოსახლეობას მოუწოდა, მორიდებოდნენ ქალაქის ცენტრში გასვლას, ხოლო მშობლებს ბავშვები სკოლაში არ წაეყვანათ სამშაბათს.
ებრაული თემის წინამძღვრის, ოსკარ დოიჩის თქმით, თავდასხმის დროისათვის სინაგოგა უკვე დაკეტილი იყო. ჯერჯერობით უცნობია, რამდენი პირი მონაწილეობდა სროლაში. ინტერნეტში გავრცელებულ ვიდეოკადრებში ჩანს, როგორ დარბიან სროლის ხმით შეშინებული ადამიანები ქუჩაში.
თავდასხმიდან მალევე, პოლიციამ დაიწყო მასშტაბური ანტიტერორისტული ოპერაცია და გადაკეტა ქალაქის ცენტრი. პოლიციის თანამშრომლები ამოწმებენ მოქალაქეების მიერ გამოგზავნილ 20 ათასზე მეტ ვიდეომასალას, სადაც ასახულია შეიარაღებული თავდასხმა.
„ეს თავდასხმა ჩვენს ფასეულობათა წინააღმდეგ იყო მიმართული. ეს გახლდათ ჩვენი დემოკრატული საზოგადოების დასუსტებისა და დაყოფის სრულიად უსარგებლო მცდელობა.“ – განაცხადა ავსტრიის შინაგან საქმეთა მინისტრმა.
შეგახსენებთ, რომ 29 ოქტობერს ტერორისტული თავდასხმა განხორციელდა საფრანგეთის ქალაქ ნიცაშიც, სადაც თავდამსხმელმა სამი ადამიანი მოკლა და რამდენიმე დაჭრა ნოტრ-დამის ტაძარში. ტერორისტული აქტი საფრანგეთსა და მუსლიმანურ სამყაროს შორის (მათ შორის, თურქეთთან) ურთიერთობის დაძაბვას მოჰყვა.