ფრანკლინ გრემი ტრამპს ბაიდენის თეთრ სახლში მიწვევისკენ მოუწოდებს

ევანგელისტი ფრანკლინ გრემი მოუწოდებს პრეზიდენტ ტრამპს არჩეული პრეზიდენტის, ჯო ბაიდენის, თეთრ სახლში მიწვევისკენ.

გრემმა ეს მიმართვა სოციალურ მედიაში პარასკევს გამოაქვეყნა, ცოტა ხნით ადრე, სანამ ტრამპი განაცხადებდა, რომ იგი არ დაესწრებოდა ბაიდენის ინაუგურაციას. ტრამპი იქნება პირველი პრეზიდენტი ბოლო 152 წლის განმავლობაში, რომელიც არ დაესწრება თავისი შემცვლელის ინაუგურაციას, ენდრიუ ჯონსონის შემდეგ 1869 წელს.

გრემი „ფეისბუკის“ და „ტვიტერის“ პოსტებში გამოეხმაურა ტრამპის ხუთშაბათს გამოქვეყნებულ ვიდეომიმართვას, სადაც პრეზიდენტმა განაცხადა, რომ მისი ყურადღება ახლა მიმართულია „ძალაუფლების შეუფერხებლად გადაცემისკენ.“ ტრამპმა ხალხს ასევე შერიგებისკენ მოუწოდა.

„გმადლობთ, პრეზიდენტო ტრამპ, გასულ ღამეს თქვენი შემრიგებლური სიტყვებისათვის ერისადმი. ვიმედოვნებ, რომ მალე მიიწვევთ არჩეულ პრეზიდენტს, ვიცე-პრეზიდენტსა და მათ მეუღლეებს თეთრ სახლში შესახვედრად, რათა მოხდეს შერიგება და ძალაუფლების შეუფერხებლად გადაცემა. ვლოცულობთ მოქმედი და ახლად არჩეული პრეზიდენტებისა და ვიცე-პრეზიდენტებისთვის და ჩვენი სხვა ლიდერებისთვის ვაშინგტონში.“ – დაწერა გრემმა „ფეისბუკზე.“  

„ემოციები ძალიან დიდია, მაგრამ ისინი უნდა დაცხრეს და სიმშვიდე იქნეს აღდგენილი. საჭიროა განკურნება და შერიგება. 2020 წელი იყო გამოწვევებით აღსავსე წელი ჩვენი ქვეყნისა და ხალხისათვის. პანდემიამ თავდაყირა დააყენა ჩვენი მოქალაქეების ცხოვრება, მილიონობით მათგანი გამოკეტა სახლებში, დააზიანა ჩვენი ეკონომიკა და შეიწირა უამრავი ადამიანის სიცოცხლე. პანდემიის დამარცხება და ეკონომიკის აღორძინება მოითხოვს ყველას ერთობლივ მუშაობას. ეს მოითხოვს სამოქალაქო ღირებულებებზე, რწმენაზე, ქველმოქმედებაზე, მოსახლეობასა და ოჯახზე უფრო მეტ აქცენტირებას. ჩვენ ხელახლა უნდა გამოვაცოცხლოთ სიყვარულის და ერთგულების კავშირი, რომელიც გვკრავს ჩვენ, როგორც ერთ ეროვნულ ოჯახს.“  – განაცხადა ტრამპმა თავის ვიდეომიმართვაში.