საშობაოდ ჩინელი ქრისტიანები საჩუქრად მიიღებენ ქრისტიანული წიგნებითა და ბიბლიებით სავსე ორ კონტეინერს. ამის შესახებ ორგანიზაცია Mission Cry-ს პრეზიდენტმა ჯეისონ ვულფორდმა განაცხადა. ორგანიზაციამ წელს 3.5 მლნ დოლარის ღირებულების 160 ათასი ბიბლია და ქრისტიანული წიგნი გაგზავნა ჩინეთში.
ვულფორდის თქმით, გაძლიერებული დევნის გამო, ჩინელ ქრისტიანებს ბიბლიები ახლა ყველაზე მეტად სჭირდებათ, ვიდრე ოდესმე.
„ჩინეთში ხურავენ მაღაზიებს, სადაც ბიბლიები იყიდება; კრძალავენ ბიბლიის ონლაინგაყიდვას. ისინი ცდილობენ რელიგიის კონტროლს და ნაცისტური გერმანიის მსგავსად, ჩინეთში მხოლოდ სახელმწიფოს მიერ სანქცირებული ეკლესიებია.“ – ამბობს ვულფორდი.
მისივე თქმით, ჩინეთის ხელისუფლება კრძალავს ბიბლიების გაგზავნას კონტინენტური ჩინეთის ტერიტორიაზე, მაგრამ ეს ნებადართულია ჰონგ-კონგში.
„ჰონგ-კონგი კარია იმისათვის, რომ ბიბლიები მოხვდეს ჩინეთის დანარჩენ ნაწილში.“ – აცხადებს Mission Cry-ს პრეზიდენტი. ორგანიზაცია ამჯობინებს ბიბლიების გაგზავნას იმ ქვეყნებში, სადაც ქრისტიანები უფრო მეტად იდევნებიან.
ჩინეთში ბიბლიების გასაგზავნად ორგანიზაციამ ითანამშრომლა მიჩიგანში არსებულ ეკლესია Marr Bible Church-თან. ეკლესიამ დააფინანსა 2 ათასი ბიბლიის გაგზავნა.
ბიბლიები და ქრისტიანული წიგნები, რომლებსაც ორგანიზაცია გზავნის ჩინეთში, ინგლისურ ენაზეა დაბეჭდილი, რადგან ქვეყანაში, დაახლოებით, 10 მლნ ადამიანი საუბრობს ინგლისურად, რაც მთლიანი მოსახლეობის 1%-ს შეადგენს.
ორგანიზაციის პრეზიდენტის განცხადებით, ბევრ ორენოვან ქვეყანაში ადამიანებს ურჩევნიათ ბიბლიის ინგლისურ ენაზე წაკითხვა.
ორგანიზაცია Mission Cry 1956 წლიდან არსებობს და ეხმარება ადგილობრივ მისიონერებს, მახარებლებს და ხუცესებს. დაარსების დროიდან მოყოლებული, ორგანიზაციამ მსოფლიოს 178 ერს გაუგზავნა 390 მლნ დოლარის ღირებულების ბიბლიები და ქრისტიანული წიგნები.