გასულ პარასკევს ქრისტიანულმა ორგანიზაციამ Faithful America შექმნა პეტიცია, რომელიც მოითხოვს ფრანკლინ გრემის გადადგომას „სამარიტელის ქისისა“ და „ბილი გრემის ევანგელისტური ასოციაციის“ პრეზიდენტისა და აღმასრულებელი დირექტორის თანამდებობებიდან.
პეტიცია, რომელსაც უკვე 20,000-ზე მეტი ხელისმომწერი ჰყავს, აკრიტიკებს გრემს ყოფილი პრეზიდენტის დაცვისა და მისი აზრის გაზიარებისათვის იმასთან დაკავშირებით, რომ 2020 წლის არჩევნები გაყალბდა. გარდა ამისა, ორგანიზაცია Faithful America აცხადებს, რომ გრემი ტრამპის მხარდამჭერად დარჩა 6 იანვარს კაპიტოლიუმზე განხორციელებული თავდასხმის შემდეგაც, სადაც 5 ადამიანი გარდაიცვალა.
ფრანკლინ გრემის კრიტიკისას ორგანიზაცია იმასაც აღნიშნავს, რომ გრემმა იესოს მიმართ იუდას გამცემლურ საქციელს შეადარა იმ ათი რესპუბლიკელის ქმედება, რომელმაც ტრამპის იმპიჩმენტს დაუჭირა მხარი.
„14 იანვარს გრემმა, პირდაპირი გაგებით, იესოს შეადარა ტრამპი, როდესაც ტრამპის იმპიჩმენტის მომხრე რესპუბლიკელები დაადანაშაულა ტრამპის ‘ოცდაათ ვერცხლად’ გაყიდვაში.“
ორგანიზაცია ბრალს სდებს „სამარიტელის ქისასა“ და „ბილი გრემის ევანგელისტურ ასოციაციას“ იმაში, რომ მათ დაივიწყეს „თავდაპირველი ქრისტიანული დანიშნულება“ და მიატოვეს იესო ქრისტეს სახარება.
ამას გარდა, Faithful America-ს განცხადებით, „სამარიტელის ქისა“ და „ბილი გრემის ევანგელისტური ასოციაცია“ მონაწილეა არჩევნებთან დაკავშირებული საეჭვო შეთქმულების თეორიების გავრცელებასა და კაპიტოლიუმის წინააღმდეგ განხორციელებულ სასიკვდილო საფრთხის შემცველ, არაპატრიოტულ ტერორიზმში.
შეგახსენებთ, რომ ორგანიზაცია, სხვა პეტიციის მეშვეობით, ადრეც მოითხოვდა „სამარიტელის ქისისგან“ ფრანკლინ გრემის გადაყენებას იმისათვის, რომ გრემმა, როგორც ორგანიზაციის აღმასრულებელმა დირექტორმა, ლოცვა წარმოთქვა 2020 წლის რესპუბლიკელთა ნაციონალურ შეკრებაზე.