ჩინეთში რელიგიურ ცერემონიათა აკრძალვამ ფართო ხასიათი მიიღო

ონლაინგაზეთ „Bitter Winter“-ის ახალი ანგარიშის მიხედვით, ბოლო რამდენიმე თვეა, რაც ჩინეთის კომუნისტური მთავრობა აფართოებს რელიგიურ შეზღუდვას დაკრძალვის ცერემონიალთან დაკავშირებით.

ივნისში ეთნიკურ და რელიგიურ საკითხთა კომიტეტმა ლიაონინის ჩრდილო-აღმოსავლეთ პროვინციაში გამოსცა უწყება დაკრძალვის ადგილებში რელიგიურ ცერემონიალთა ჩატარების აკრძალვის შესახებ. ეს ასევე გულისხმობს ქადაგების, ბიბლიის კითხვისა და რელიგიური საგნების გავრცელების აკრძალვას სასაფლაოებზე, დაკრძალვის ბიუროებსა და მსგავს ადგილებში.

ქალაქ დანდუნის ეთნიკური და რელიგიური საკითხების დეპარტამენტმა გამოსცა ბრძანება, რომელიც კრძალავს „კერძო რელიგიურ საქმიანობას რელიგიური ადგილების ფარგლებს გარეთ“.

დოკუმენტი ითვალისწინებს დამკრძალავი ბიუროების შემოწმებას და მოუწოდებს რელიგიურ დაწესებულებებს თვითშემოწმებისკენ, რათა მსგავსი საქმიანობა თავიდან იქნეს აცილებული.

ივლისში რელიგიური საკითხების ბიურომ ეკლესიების დირექტორებს შეატყობინა, რომ მათ ეკრძალებათ საქორწინო და დაკრძალვის ცერემონიალების ჩატარება. „ნებისმიერ სასულიერო პირს, რომელიც მაინც ჩაატარებს ამგვარ მსახურებასა და ცერემონიალს, დასჯიან.“ – განაცხადა ეკლესია „Three-Self“-ის მქადაგებელმა ქალაქ შენიანიდან.

აკრძალვები მოქმედებს სხვა ადგილებშიც, ფაქტობრივად, ადამიანები საკუთარ სახლებშიც კი დევნილები არიან.

აპრილში, როდესაც ჰენანის პროვინციის ერთ ქალაქში ეკლესია „Great Praise Church“-ის ერთ-ერთი წევრი გარდაიცვალა, გარდაცვლილის ოჯახმა გადაწყვიტა, მიცვალებულის დასასვენებელი ადგილი შესაფერისად მოეწყო. ეს საკმაოდ გავრცელებული პრაქტიკაა ჩინელ ქრისტიანებში; მაგრამ ხელისუფლების წარმომადგენლებმა აუკრძალეს მათ რელიგიური სომბოლიკის მქონე ატრიბუტების გამოყენება სახლებში, და ამავდროულად, არც შესაბამის ნაგებობათა აგების ნებას აძლევდნენ.

იმავე თვეში ეკლესია „Three-Self“-ის მქადაგებელს აიძულეს, შეეწყვიტა დაკრძალვის ცერემონიალი, რომელსაც ის ოჯახის გარდაცვლილი წევრისთვის ატარებდა. „თუ მე გავაგრძელებ რელიგიური ცერემონიალების ჩატარებას, შესაძლოა, ჩემი ეკლესიაც სამუდამოდ დახურონ.“ – განმარტა მან.

ერთ-ერთმა მორწმუნემ ქალაქ ნინბოდან „Bitter Winter“-ს უამბო, რომ მისი ეკლესიის წევრები აპრილსა და ივნისში ორჯერ იყვნენ მისულები ადგილობრივ კრემატორიუმში, რათა ეგალობათ საგალობლები გარდაცვლილ მორწმუნეთათვის, მაგრამ დაცვის თანამშრომლებმა გააფრთხილეს, დაეტოვებინათ შენობა. როდესაც მათ მოითხოვეს ახსნა-განმარტება, დაცვის წევრებმა უპასუხეს, რომ „აკრძალულია რელიგიური საგალობლების გალობა, რადგანაც ჩინეთი ათეისტური ქვეყანაა.“