საერთაშორისო ორგანიზაცია Open Doors-ის მიერ ბოლო პერიოდში გამოქვეყნებული მონაცემების მიხედვით, ქრისტიანები ბოლო წლის განმავლობაში ყველაზე მეტად იდევნებოდნენ. ორგანიზაციამ დაასახელა ის 50 ქვეყანა, სადაც ქრისტიანებს ყველაზე მეტად დევნიან. ჩრდილოეთ კორეა უკვე წლებია, ამ სიის უცვლელი ლიდერია.
ფაქტებისა და მძიმე ბრალდებათა მიუხედავად, კიმ ჩენ ინის რეჟიმი მტკიცედ უარყოფს ადამიანის უფლებათა რაიმე სახის დარღვევას კორეის ტერიტორიაზე. ჩრდილოეთ კორეაში თუ ქრისტიანებს აღმოაჩენენ, მათ შრომით ბანაკებში გზავნიან, როგორც პოლიტიკურ დამნაშავეებს, ანდა სულაც, ადგილზევე ხოცავენ. ქრისტიანთა დევნას ჩრდილოეთ კორეაში რადიკალური ფორმა აქვს. სხვა ქრისტიანებთან შეხვედრა და უფლის განდიდება თითქმის შეუძლებელია, თუ ეს სრულიად საიდუმლოდ არ მოხდა. ქვეყნის ბოლოდროინდელ აქტიურობას საერთაშორისო დიპლომატიაში, რომელიც 2018 წელს სამხრეთ კორეაში ზამთრის ოლიმპიადის ჩატარებიდან დაიწყო, არავითარი ცვლილება არ მოუტანია ქვეყანაში მცხოვრები ქრისტიანებისათვის.
ვარაუდობენ, რომ მთელი ჩრდილოეთ კორეის მასშტაბით დაპატიმრებულია, დაახლოებით, 120 000 ადამიანი. პატიმრებს მონებივით ეპყრობიან და ამუშავებენ. ერთ-ერთი ყოფილი პატიმრის ცნობით, კონგორის ციხეში მისი ყოფნის 8-თვიანი პერიოდის განმავლობაში, დაახლოებით, 800 პატიმარი დაიღუპა მძიმე შრომისა და შიმშილის გამო.
აღსანიშნავია, რომ მსოფლიოს მასშტაბით პანდემიის პერიოდშიც კი არ შემწყდარა ქრისტიანთა დევნა, უფრო მეტიც, ზოგ ადგილებში გაუარესდა კიდეც. კოვიდ-19-ს ხელისუფლები ამისათვის კარგად იყენებენ, რომ რაც შეიძლება მკაცრი შეზღუდვები დააწესონ და აღკვეთონ ქრისტიანებს შეკრება. პანდემიამ ასევე წარმოშვა დისკრიმინაციის ახალი ფორმა, ქრისტიანთა განზრახ გამორიცხვა კორონა ვირუსის ვაქცინის მიღებისგან, მათი რწმენის გამო. ჰენრიეტა ბლიტი, დიდი ბრიტანეთის Open Doors-ის აღმასრულებელი ხელმძღვანელი აცხადებს:
„ეს წელი მილიარდობით ადამიანისთვის იყო რთული წელი. გულს მიკლავს ის დამოწმებები, რომლებსაც ინდოეთიდან და ვიეტნამიდან ვისმენთ. ქრისტიანებს არ აძლევენ საჭმელსა და სამედიცინო დახმარებას და ეუბნებიან: ‘დაე, შენმა ღმერთმა გამოგკვებოს’. ყველაფრის მიუხედავად, იმედს მაინც არ ვკარგავ, ჩემი თვალით მინახავს, როგორ აძლევს ეს ყველაფერი სიმამაცესა და ძალას ქრისტიანებს. ჩვენი ორგანიზაცია მხარს უჭერს ყველა იმ ქალს, მამაკაცსა და ბავშვს, რომელიც ყველაფრის მიუხედავად მტკიცედ ინარჩუნებს რწმენას.“
2020 წლის შემაჯამებელი მონაცემების თანახმად, 340 მილიონი ქრისტიანი, მსოფლიოს მასშტაბით, დევნის მსხვერპლია. მდევნელი ქვეყნების ჩამონათვალში პირველი ხუთეული ასე გამოიყურება: ჩრდილოეთ კორეა, ავღანეთი, სომალი, ლიბია, პაკისტანი.
P.S. გთხოვთ, ილოცოთ ქრისტიანთათვის, რომლებიც იდევნებიან.