პროფესიონალური ჭიდაობის მსოფლიო ვარსკვლავი ჰალკ ჰოგანი, რომელმაც 2 წლის წინ მოინანია თავისი განვლილი ცხოვრება და ქრისტიანი გახდა, „ინსტაგრამის“ პირად გვერდზე წერს:
„ვფიქრობ, ღმერთი იყენებს პანდემიას კერპების დასანგრევად, რომლებიც ჩვენ შევქმენით. ახლა ღმერთმა წაგვართვა ყველაფერი, რასაც თაყვანს ვცემთ. თითქოს ის ამბობს: თქვენ გინდათ, თაყვანს სცემდეთ სპორტსმენებს? მე დავხურავ სტადიონებს. თქვენ გინდათ, თაყვანს სცემდეთ მუსიკოსებს? მე დავხურავ საკონცერტო დარბაზებს, გინდათ მსახიობების თაყვანისცემა? მე დავხურავ თეატრებს. თქვენ გინდათ ფულის თაყვანისცემა? მე დავცემ ეკონომიკას და დავშლი საფონდო ბირჟას. თქვენ არ გსურთ ეკლესიაში წასვლა და ჩემი განდიდება? თქვენ თაყვანს მცემთ იქიდან, სადაც იმყოფებით.
იქნებ ჩვენ არ გვჭირდება ვაქცინა, იქნებ ჩვენ უნდა გამოვიყენოთ იზოლაციის ეს დრო და გვქონდეს პირადი აღორძინება, სადაც აქცენტს გავაკეთებთ მხოლოდ იმაზე, რაც ნამდვილად მნიშვნელოვანია ‒ იესო ქრისტე.
ბიბლია, მე-2 ნეშტთა წიგნი, მე-7 თავის მე-14 მუხლი:
‘და ჩემი ხალხი, რომელიც ჩემი სახელით იწოდება, ქედს მოიდრეკს, ილოცებს, ჩემს სახეს მოძებნის და შემობრუნდება თავისი ბოროტი გზიდან ‒ მაშინ მოვუსმენ ზეციდან, ცოდვას მივუტევებ და განვკურნავ მათ მიწას.’“
ჰალკ ჰოგანი 1953 წელს დაიბადა, მისი ნამდვილი სახელი და გვარია ტერი ჯინ ბოლე. ის ამერიკელი პროფესიონალი მოჭიდავე, მსახიობი და შოუმენი გახლავთ. არის მსოფლიოს თორმეტგზის ჩემპიონი ჭიდაობაში. მისი კარიერის აღმავლობა 70-იან წლებში დაიწყო, თუმცა იგი ახლაც პოპულარულია, „ინსტაგრამზე“ მას 1,5 მილიონი გამომწერი ჰყავს, ხოლო 2019 წელს მის შესახებ ბიოგრაფიული ფილმის გადაღება დაანონსდა, რომელშიც მოთხრობილი იქნება მისი 70-80-იანი წლების სპორტული ცხოვრების შესახებ. ჰოგანის პერსონაჟს „მარველის“ კინოკომიქსების ვარსკვლავი, ახალგაზრდა ავსტრალიელი მსახიობი კრის ჰემსუორთი ითამაშებს. ფილმში მონაწილეობას თავად 66 წლის ჰალკ ჰოგანიც მიიღებს. მისი, როგორც მსახიობის დებიუტი „როკი III“-ში შედგა.