„დარჩით ჩემს სიყვარულში და ბევრ ნაყოფს გამოიღებთ.“ − ეს ბიბლიური ციტატა იოანეს სახარებიდან, გახლავთ დევიზი 2021 წლის ქრისტიანთა ერთობის ლოცვის კვირეულისა, რომელიც 18-25 იანვარს არის დაგეგმილი მსოფლიო მასშტაბით.
კვირეულის ფარგლებში სხვადასხვა ქვეყანაში ქრისტიანები ერთობლივად აღავლენენ ლოცვას მშვიდობისა და ერთიანობისთვის. იდეას საფუძვლად იესოს სურვილი უდევს: „რათა ყველანი ერთნი იყვნენ“ (იოანეს სახარება 17:21).
ეკუმენური ლოცვის კვირეულს ასწლოვანი ტრადიცია აქვს. იგი გასულ საუკუნეში მოღვაწე ფრანცისკანელი მღვდლის ინიციატივას წარმოადგენს. მოგვიანებით მსოფლიო ეკლესიათა საბჭომ ლოცვის კვირეული საყოველთაო გახადა და ყოველ წელს ერთობლივი ლოცვისთვის იანვრის ბოლო კვირა დააწესა.
საქართველოში ოთხი ქრისტიანული კონფესია უერთდება საყოველთაო ლოცვის კვირეულს: კათოლიკური ეკლესია, სომეხთა სამოციქულო მართლმადიდებელი ეკლესია, ევანგელურ-ლუთერული ეკლესია და ევანგელურ-ბაპტისტური ეკლესია. ისინი ერთობლივ ლოცვას 22 იანვარს, 15:00 საათზე აღავლენენ.