9 ივლისს ცნობილმა ქრისტიანულმა ბენდმა, „Hillsong United“-მა ახალი სიმღერა გამოუშვა, სახელწოდებით „Know you will“. სიმღერა ბენდის წევრების, იოელ ჰიუსტონისა და დილან ტომასის დაწერილია. სიმღერის ძირითადი მიზანია, იმედი მიუტანოს ადამიანებს ძნელბედობის ჟამს.
„სიმღერაში მოთხრობილია ის ბოლო 18 თვე, რომელშიც ჩვენ ვიმყოფებოდით. ეს პერიოდი ყოველმხრივ რთული იყო მთელი მსოფლიოსთვის. ხშირად რწმენა შორეულ, მიუწვდომელ რაღაცად გვეჩვენება, თუმცა ის რეალური ხდება მაშინ, როდესაც ვხვდებით, რომ ყველაფერი, რაზეც იმედს ვამყარებდით, წარმავალია.“ – აცხადებს სიმღერის ავტორი იოელ ჰიუსტონი.
სიმღერის ტექსტში ამგვარ სიტყვებს ვკითხულობთ:
„როდესაც ირგვლივ გზა ქრება,
შენ ხედავ მას, რომლის დანახვაც მე არ შემიძლია.
როდესაც წინსვლა აზრს კარგავს,
შენ ამბობ: სწორედ ახლა გჭირდება რწმენა.
როდესაც მე ირგვლივ მხოლოდ წყალს ვხედავ, შენ ხედავ აღთქმას,
როდესაც მე სიკვდილს ვუყურებ, შენ ხედავ სიცოცხლის კარს,
როდესაც დანებების პირას ვარ, შენ ხედავ ახალ საწყისს.
მისამღერი: არ ვიცი, საიდან გამოაჩენ გზას,
მაგრამ ვიცი, რომ ამას აუცილებლად იზამ.
„Hillsong United“-ი არის თანამედროვე ქრისტიანული მუსიკის შემსრულებელი ბენდი, რომლის სიმღერები და საგალობლები მთელ მსოფლიოშია ცნობილი. ბევრ ქვეყანაში მათ დაწერილ ქება-დიდების სიმღერებს თარგმნიან და გალობენ ეკლესიებში. ბენდს 6.5 მილიონზე მეტი ალბომი აქვს გაყიდული მსოფლიო მასშტაბით. ის დღემდე ნომერ პირველ ქრისტიანულ ბენდად რჩება მსოფლიოში და სოციალურ ქსელში ისინი 13 მილიონამდე გულშემატკივარს აერთიანებენ.